Durante un conferencia di prensa ayera mainta Conseho Electoral di Aruba a informa comunidad tocante con e proceso ta bayendo pa dia 6 di december, kico por spera pa dia di eleccion y a elabora tocante e carchinan di voto cu no a yega nan destino final.

Presidente di Conseho Electoral, Rossi Marchena, a resalta cu nan ta hopi contento con e proceso ta bayendo. El a informa cu siman pasa tabatin un dia informativo cu tur e miembronan di e urnanan, cada urna tin cinco miembro y tin 70 urna plus dos urna cu ta mobil.

Cada urna tin un presidente y un segundo presidente y el a indica cu e siman aki atrobe ta bati tin un sesion informativo pa e presidente y segundo presidente di e urnanan pa pone mas atencion riba e puntonan cu ta importante durante dia di eleccion.

Pa loke ta trata logistica, el a splica cu e urnanan ta den preparacion y ya caba DOW a cuminsa instala algun urna. E siman aki Conseho Electoral lo sali controla e urnanan pa wak si tur cos ta na orden y conforme ley.

Un punto importante cu Marchena a trece dilanti tin cu trece dilanti ta punto di carchi di voto (oproepingskaart). Manera ta conoci un cantidad di hende no a haya nan carchi di voto na cas y carchi a bay back Censo. Segun e el a indica ta normal cu algun carchi di voto no ta ser entrega door di Post Aruba.

E aña aki, el a splica, e total di carchinan cu no a ser entrega tabata un tiki mas halto compara cu añanan anterior. Un total di 2,260 carchi di voto a ser entrega back door di Post Aruba na e oficina di Censo.

Sra. Sharine Luidens a splica cu di e 2,260 carchinan aki mayoria, 2,127, a bay back Censo pa motibo cu e cas no tin postbus, 80 tabata pa motibo di cachonan cu segun Post Aruba a splica ta brabo y 45 tabata pa motibo adres fout of onbewoond. Esaki ta representa alrededor di 3% di e total cu a ser entrega, cual ta un cifra no significativo ora cu mira e total cu si a ser entrega.

El a sigui splica cu manera ta conoci caba despues di dia 29 di november e personanan cu no a ricibi nan carchi di voto por pasa busca esaki of un duplicado entre 4or y 6:30 di atardi na oficina principal di censo.

Luidens a indica cu e prome dia cu Censo a habri pa entrega carchi di voto of duplicado pa esnan cu no a haya nan carchi tabatin un poco contratiempo pa motibo cu mester a sortia e carchinan ya cu nan ta prefera di entrega e carchi di voto original en bes di un duplicado. El a remarca cu nan a logra entrega alrededor di 350 carchi of duplicado e prome dia, cual ta ongeveer 15% di e 2,260. Ta calcula cu den e proximo dianan, si e votadornan tuma e responsabilidad pa busca nan carchi, nan ta logra entrega tur e carchinan di voto aki.

Pa loke ta trata e total di votador registra, el a informa cu tin 69,824 votador registra y 69,209 carchi a ser entrega na Post Aruba. Carchinan di voto cu a keda atras, cu no a ser entrega na Post Aruba tabata di 205 hende registra na Censo sin adres, 70 persona cu a fayece entre e ciere di registro y e dia cu a entrega e carchinan na Post Aruba, 213 carchi cu codigo di post cu no ta coincidi y 127 hende cu a inmigra. El a specifica cu e personan cu a inmigra, dia cu e registro a cera nan tabata registra ainda na Censo como Hulandes,cu mas di 18 aña y residencia na Aruba, pues ta nifica cu nan tabatin derecho di voto. Despues di e ciere di registro nan inmigra y a schrijf uit y Censo a keda cu e carchinan ey.

Luidens a splica tambe cu Electorale Raad ta scoge pa traha semper cu Post Aruba pa motibo cu e diferencia entre e oferta cu nan ta ricibi di Post Kantoor y otro companianan ta significativo, y Post Aruba ta e opcion mas economico.

Presidente di Conseho Electoral, Marchena, a splica cu dia di eleccion tur urna ta habri 8or di mainta y ta cera 7or di anochi. Tur persona cu ta desea di vota mester bin cu su carchi di voto, y un documento di identificacion, esaki por ta paspoort, rijbewijs of cedula pa por eherce su derecho di voto.

Na momento cu e persona yega na e urna e ta entrega su carchi di voto y su identificacion na e presidente di e urna ken ta controla esaki. E ta menciona e number cu e votador ta registra riba e lista y e di dos miembro di urna ta menciona e fam di e votador pas asina controla si e persona cu a bin cu e carchi di voto ta persona cu tin e derecho di vota. E votador ta haya su stembiljet y e por eherce su derecho di voto.

El a sigui splica cu despues di vota e votador mester deposita e stembiljet den e buzon. El a enfatisa cu ta hopi importante pa e stembiljet ta cera di manera cu e firma di e presidente di Conseho Electoral ta visibel y ta pone asina den e buzon. E votador no por sali cu e stembiljet habri, e no por mustra pa ken el a vota. Den caso cu esaki sucede, e stembiljet ta ser declara no usabel, “onbruikbaar” e voto no lo conta y e persona no lo haya otro stembiljet pa vota mas.

Pa loke ta trata e conteo di voto, el a menciona cu e conteo di e votonan ta tuma luga na cada urna. E conteo ta ser realisa door di e miembronan di cada urna y ta ser dirigi door di e presidente di cada urna. Despues cu e conteo tuma luga e stembiljetnan ta ser seya y ta ser escolta door di miembro di Cuerpo Policial pa hiba nan na Hoofdstembureau. El a enfatisa cu Conseho Electoral no ta habri e stembiljetnan, nan ta keda cera.

Marchena a indica tambe cu tur votador, tur persona cu ta desea di ta presente na un urna pa wak con e proceso di votamento ta tuma luga y tambe con e proceso di conteo di voto ta tuma luga tin e derecho pa ta presente.

Durante anochi, Conseho Electoral lo transmiti live e resultadonan preliminar. Despues cu e conteo di voto ta tuma luga, ta seya e stembiljetnan y ta trece esakinan na Hoofdstembuereau por cuminsa haya un idea di cuanto hende a vota, cuanto voto ta valido y por cuminsa haya un idea tambe cuanto voto mester tin pa un partido tin un asiento den parlamento.

E total di voto cu un partido mester pa haya un asiento ta depende di cuanto voto valido tin. El a splica cu e total di voto valido ta ser dividi door di 21 y asina ta haya sa cuanto voto un partido mester pa e por haya un asiento.