Den un entrevista cu veterinario Natalie Booi di Animal Care Clinic el a duna informacion y tip pa con por cuida pa e bestia di cas awor cu a cuminsa cu bendemento di klapchi. Hopi hende ta core busca remedi pa trankilisa un cacho mientras cu tin biaha e no ta ni necesario, e veterinario ta amplia riba esaki.
Kisas e ta algo di antes y cu awo hende ta keda aplica y ta haci uzo d un trankilisante keriendo cu gewoon mester pasobra sino algo grave ta pasa cu e cacho. Segun e veterinario mayoria cacho si nan no a sufri di un trauma door di klapchi, pues cu un klapchi a spanta nan hopi, nan no tin miedo di dje. “Di mes nan no ta compronde kico ta pasando, pues bo por ripara cu nan ta un poco spanta of nervioso (mescos cu un mucha lo reacciona), sin embargo nos no ta bay droga e mucha. Pues hopi biaha tin otro cos cu por haci pa e cacho sinti miho.”
Hopi bestia perdi na januari
Ta importante pa busca un luga safe pa e bestia di cas, mirando cu cacho of pushi por core bay. esey ta algo cu kier preveni ora cu anochi laat klapchi ta zona. E posibilidad t’ey cu nan ta spanta y nan ta core bay perdiendo nan caminda como tin zonido tur caminda. “P’esey den e prome siman di januari semper ta haya masha hopi mascota perdi. Esaki ta bin como cu hopi hende no ta consciente di e cacho. A yega di pasa cu e cachonan ta bula heki of ta kauw e haula di spanto y bay. Den e estado di panico aki auto por dal nan tambe entre otro.
Pa evita esaki por hinca nan den un garashi, un camber cu kisas no ta wordo uza, un baño, pone musica of television, cual lo yuda pa distrai nan. Segun Sra. Booi esaki ta aplicabel pa pushi y cacho, pa parhanan por tapa e haula etc.
E Facebook ta hopi importante den caso cu un cacho perde y tin un pagina lost and found special pa cacho. Hopi biaha cu un doño di cacho perde un mascota ta contact e veterinarionan y ta haya e flyernan. Tambe tin hende ta trece un cacho cu nan no sa di ken e ta. Pues e ta algo hopi comun cu por wordo preveni.
Tipo di trankilisante
Den e trankilisantenan tin diferente tipo, veterinario Booi ta bisa cu na nan clinica ta haci uzo di e Valium cual ta algo cu ta wordo uza pa hende tambe. Valium ta trankilisa musculonan y ta un trankilisante leve. E efecto cu e tin den e celebro ta cu e ta deprimi e impulsonan cu ta haci e cacho groggy. Tin hende ta haya esey eng sinembargo ta e efecto cu ta wordo busca como cu no kier pa nan experencia e zonido, stress o bochincha y pa nan relaha.
Otro remedinan cu ta wordo uza na Aruba segun Sra. Booi ta por ehempel Acepramezine cu ta paralisa e cacho di pafo pero no ta traha riba e celebro di e cacho. Pues aunke cu e no por expresa su susto e ta registra tur cos di paden. “Esaki ta hopi tristo como cu bo ta kere cu e ta trankil pero di paden su mundo ta cabando. Esaki ta uno cu nos no ta recomenda pa uza, specialmente pasobra tin otro alternativa cu por uza cu ta miho y mas facil.”
Tin mas remedi cu ta wordo uza riba hende tambe manera ora cu hende ta bay biaha cu ta obtenibel na botica manera Valerian. “Esakinan tambe ta alternativanan mas safe cu un droga. Di mes tin casonan cu e bestianan ta hopi miedoso y cu mester uza algo, sino e ta bira un peliger pa abo como e doño y tambe pa e mascota.” Segun Sra. Booi tabatin casonan unda cu e cacho a spanta hopi y el a keda rasca e porta te habri tur su patanan, of nan ta kauw riba algo y herida nan mes of ta ataca hende door di e spanto.
Esakinan ta comportacion cu ta presenta hopi biaha cerca cachonan cu tin un of otro trauma. Cachonan cu ta miedoso pa hopi cos, manera uno rescata for di caya, un cacho cu manera bo hisa bo bos e ta sak den otro etc. ta cachonan cu a sufri cierto trauma den e fase cu nan a socialisa ora cu nan tabata puppy. E trauma aki ta haci nan desconfia den tur cos. Cachonan asina aki probablemente ta bay reacciona spanta y bay den panico pa e klapchi y cu bo lo mester dun’e algo. Esaki no ta kita cu bo por purba sin nada y wak con e ta bay. Den e proceso aki no ta consehabel pone riba un patio unda cu e ta wak y scucha tur cos.
Mas cacho hunto
Depende di e “roedel” (grupo di cacho), si nan tin harmonia, un ta yuda e otro. Hopi biaha, cachonan grandi ta mustra esunnan chikito con pa actua. Si e grandi ta drumi, e chikitonan prome por reacciona riba locual cu ta pasando pero unabes nan wak e grandi nan ta bay trankilisa. Sin embargo si tin un roedel unda cu tin dos of tres cacho cu ta bringa cu toro constantemente esaki por ta un trigger. Nan por bira agita pa motibo di e stress di e klapchi cual ta haci cu nan fuse ta bula mas lihe. “Den e caso aki mi ta recomenda pa separa nan pa nan no bay bringa cu otro.”
Mayoria doño conoce nan mascota y sa si tin bringamento regularmente of si e ta nervioso, a base di esey e por tuma un bon decision over con pa actua.
A puntra Sra. Booi si tin cierto rasa di cacho cu ta mas miedoso cu otro pa cual el a bisa cu no ta asina. E ta depende di e doño. Hopi biaha nos ta culpa un cacho pa e manera cu e ta actua, pero mayoria biaha ta door di e doño of experiencia cu e cacho a pasa aden cu hende. Con hende ta actua rond di e cacho of con el a wordo lanta ta determina su gran parti di su comportacion.
Concluyendo Sra. Booi a enfatisa cu e ta importante pa e doñonan prepara nan mes y no warda te na ultimo ora pa busca pildo por ehempel. Nos ta purba di semper tin den stock pero ta depende di e proveedor, p’esey purba ta na tempo. Aworaki caba por cuminsa wak na cas unda ta un luga apropia pa pone e mascota no warda te ultimo dia. Awo cu ta bay cuminsa tende zonido di klapchi por tin un idea tambe di con e cacho ta reacciona. Tin barionan cu tin mas mucha ta biba lo ta mas druk cu otro, unda cu por spera cu e cachonan lo tin mas molester. Mester corda cu e oido di e cacho ta hopi mas skerpi y sensitivo cu di nos, cual ta haci cu nan ta reaccion riba un zonido cu nos no ta ni scucha. Ta bon pa tin un caminda pa e mascota sconde y kisas un paña cu bo holo pa e ta mas confortabel.
