Ayera mainta por a nota decenas di hende na yegada di Sinterklaas na Waf di Oranjestad. Varios tabata e comentarionan cu e tradicion na Aruba no ta discrimina.
A pesar di e tempo cu e fin di siman aki a trece basta awa cu ne, ayera mainta decenas di hende a bay celebra yegada di Sinterklaas manera tradicion. Tabata tin musica, ambiente y hopi mangel cu e pietnan a parti na e muchanan. E ambiente tabata uno festivo manera semper, cu pietnan bailando, muchanan hariendo, y algun mayornan menasando nan yiu pa hiba Spaña. Un mayor por ehempel a bisa un piet cu su yiu no ta gusta drumi trempan. E piet a cana bay cu e mucha pero no a hink’e den saco. Nos a puntra e mayor su opinion riba henter e asunto cu ta reinando na Hulanda ainda riba e protesta contra e festival aki. E mayor ta bisa cu esaki ta un festival cu tur mucha a lanta cu ne. “Fiesta di mucha bo no mester kibra,” el a bisa Bon Dia.
Racismo
Otro mayornan cu nos a acerca durante e parada tambe tabata di opinion cu e ta un fiesta di mucha cu bo mester lag’e na pas. Riba nos pagina di Facebook, Bon Dia 24 Aruba, nos por a tuma nota tambe di varios comentario pro y contra. Hendenan cu por ehempel a comenta cu tin un homber blanco riba un cabay bisando su esclavonan kico pa haci, pues e ta un festival racista. Otronan a comenta cu esunnan cu kier keha riba tradicionnan cu ta andando prome cu nan a nace, mester djis no bay y laga e muchanan disfruta na pas. “Mi ta sigur tin tanto otro tragedianan den bo pueblo cu bo por para pe,” un persona a comenta. Na Europa varios grupo di hende a cuminsa lanta mas pisa contra e tradicion di pietnan cu caranan preto pinta. Segun nltimes.nl, algun bus yena cu manifestantenan a wordo para por medio di un grupo di 35 persona cu tabata staciona riba e caretera pafo di Heerenveen, Friesland, diasabra pasa. E manifestantenan tabata na caminda pa e yegada oficial di Sinterklaas na Dokkum, 50km leu for di unda nan a haya aprobacion pa marcha contra e festival. “Tabata tin mas o menos 30 homber blanco y hende muhe tambe cu a sali for di nan vehiculo y cuminsa bati riba bentana di nos busnan,” un di e manifestantenan a bisa, categorisando e situacion como uno espantoso.
“Zwarte Piet ta mustra con extremo hende Hulandes por bira ora cu bo purba critica racismo of sociedad Hulandes. Locual a pasa ta refleha e punto aki,” el a nota. Sin embargo na Aruba varios hende ta expresa cu nan no ta mira nada racista di e festival aki, pues ta parce di ta un discusion cu lo keda bini bek anualmente.
