Cu ocasion di Dia di Mama, Bon Dia Aruba tabatin e honor di entrevista un di e mamanan di cultura di Aruba, Maybelline Arends Croes, un persona asina balente y inspirador, cu sigur ta laga su huella riba tur persona cu tin e placer di conoc’e.

Maybelline ta conta cu su infancia na Aruba tabata uno bunita. “Mi tabatin e suerte di lanta den un temporada bo ta bisa, compara cu awendia, hopi mas trankilidad, hopi mas seguridad pa nos hobennan.” El a conta cu nan a biba na Santa Cruz pa dos of tres aña y despues a muda pa Playa, cerca di unda awendia tin Elmar. “Elmar no tabata existi e tempo ey, tur tabata mondi, tur tabata nos tereno di hunga.”

Pa Maybelline, musica tabata su acompañante desde chikito. El a conta cu tempo su tata tabata traha na Lago, el a cumpra un piano for di un colega pa un prijs masha barata, maske e mes no tabata toca piano. “Di chikito, mi ta kere 7, 8 aña e piano ta eynan, anto e tabata tenta mi, mi tabata bay mi piano anto mi ta cuminsa mishi cu e teclanan. Anto nan a ripara cu mi tabata cuminsa saca melodia.” Cu su 9 aña di edad, su mayornan a dicidi pa mand’e les di piano. Despues el a bay Arubaanse Muziek School, y asina el a keda siña musica. Su tata a ripara cu Maybelline tabatin interes den musica y a regal’e un cuarta, y simplemente door di observa e grupo cu tabata toca musica cerca su welo riba diadomingo, el a imita te cu el a siña toca.

Maybelline a conta tambe cu e tabata entre e prome grupo di mucha muher cu por a asisti na HBS (cu awo ta HAVO). Tempo aya, scol tabata segrega entre mucha homber y mucha muhe, anto HBS tabata pa mucha homber so. Eventualmente a ofrece pa Maria College scoge 12 mucha muhe pa bay e prome klas di HBS hunto cu e muchanan homber cu tabata bay Dominicus College, na aña 1957. Prome cu esey tabatin MULO (cual despues a bira MAVO) so pa mucha muher. Door cu e tabata e prome grupo di mucha muher bayendo un scol di mucha homber, “na cabes tabata un soeur, cu tabata permiti nos djis bay e scol. Nan ta baha nos na nos scol di mucha muhe, anto e 12 mucha muhe cu e cabesante, cu tabata soeur Dorothea, a compaña nos tres luna largo canando di Maria College bay Dominicus College, pasa tur e tereno cu e mucha homber ta keda wak nos.” E soeur tabata compaña nan te den e klas. Eventualmente a custuma, y pa fin di aña ya a permiti nan bay riba nan mes na e scol. “Tiki tiki el a cuminsa ta custuma, e tradicion a kibra di mucha muher separa y mucha homber separa.” Pa ora a habri Colegio Arubano na Vondellaan na 1959, ya e klasnan tabata mixto.

Den e experiencia pionero aki, Maybelline tabatin un acompañante kende a keda su paralel pa hopi otro momento clave di su bida: Wouter van Romondt. “Pa casualidad mi tabata den e klas, anto hunto cu mi tambe tabata Wouter van Romondt; nos tur dos tabata alumno di HBS na Colegio Arubano. Nos a slaag, ami a scoge bay sigui studia musica na Hulanda, el a bay sigui studia arte visual. Nos tur dos a caba nos estudio, nos a bin back aña ’68, y nos tur dos a haya trabao back na Colegio Arubano. Nos ta e prome dos studiante cu a bin back studia haya trabao como docente na e mesun scol unda nos a haya nos enseñansa. Nos tabata e prome Arubianonan cu a haya trabao como docente na Aruba.”

Pero nan biahe como pionero no a keda eynan. “Y nos tur dos, dia cu na caminda pa Status Aparte a bini cu un propio himno y un propio bandera na aña ’76, a forma Comision Nacional pa e celebracion ey, pero tambe un comision apart pa himno, y un comision apart pa cual ta bay bira e comision di bandera. Nan a pidi ami pa ta den comision di himno, y nan a pidi Wouter pa ta den comision di bandera,” Maybelline ta conta cu un sonrisa.

Tocante su mama, Maybelline ta conta cu maske e tabata traha henter dia, e tabata dedica tempo di calidad na su yiunan. “Momento cu e tin, e tabata pasa calidad di tempo cu nos, siña nos diferente wega di mesa.” Nan tambe tabata bay picnic y wak pelicula. “Mi mama tabata un hende cu hopi briyo. Y ta fo’i bo mayornan bo ta haya educacion, inspiracion, motivacion.”

Mama di Maybelline a caba scol na Santa Cruz, unda el a lanta, te di zesde klas. Na Santa Cruz no tabatin ULO, anto no tabata permiti e tempo aya un yiu muhe subi bus pa bay Playa pa bay scol, pues ora el a caba scol basico, el a cuminsa traha cu su mayornan na cas. Maybelline ta conta cu su welo tabatin un tienda cu a bira un supermercado, y eyden e mama tabata traha. Eventualmente sinembargo, tempo cu Maybelline tabatin como un aña y mey di edad, su mama a bay Merca pa studia pa pelukera. “Mi mama cu su tiki di Ingles, tabatin e briyo pa biaha su so pa bay Merca, pa bay scol ayanan y haya su diploma, pa despues bin back y traha den su salon di beyesa na Playa.” E tambe tabata gusta canta y baila.

Ademas, ta for di su mama cu Maybelline ta haya e pasion pa actonan caritativo. “E tabatin su maletin anto tur siman e ta bay hospital, pasa rond weita cua pashent mester kisas un corta di cabey, e ta hacie por nada. E tambe tabata bay Pavilioen mesun cos, bishita e casnan di anciano, weita ken mester un corta di cabey, tur e tabata hacie por nada.” E tambe tabata den comision di boluntario di hende muhe so, unda tabata bishita hendenan enfermo pa comparti y anima nan den nan temponan dificil. “Semper mi a lanta cu mi mama tabata haci cosnan caritativo.”

Tocante e significado di ta mama, Maybelline ta bisa cu “lo mas importante ta pa bo duna bo amor, bo tempo, y e mester ta na e calidad. Semper pa bo t’ey pa bo yiunan, pa por papia cu nan, splica nan y compronde nan.” E ta bisa cu maske un mama ta traha, y por tin menos tempo pa su yiu, “mi tin e ehempel di mi mama cu a traha resto di su bida, y no tin un hende mas cera cu mi mama cu mi, nos a lanta asina pega cu otro.” E momento cu e por, e ta pasa cu su yiunan, hasta ora e tabata den training of les, e tabata bay cu su yiunan. “Semper lo importante ta e union. Mester tambe corigi, pero corigi cu amor, pasobra e ora bo ta educa nan. Pero e amor ta importante. Y esey semper nos a siña di mi mama.”