Dialuna maximo autoridad electoral di Ecuador a nenga e conteo di tur voto, cu a resulta for di e proceso di eleccion di dia 2 di april, y cu candidato opositor Guillermo Lasso a pidi den su solicitud di apelacion.

Tribunal Contencioso Electoral (TCE)  a dicidi den sentencia emiti,  pa no acepta e recurso di apelacion cu e ex-candidato opositor a presenta, caminda ta solicita  habri tur urna electoral y cuminsa cu un conteo manual, voto pa voto, pa asina por declara tambe nulidad di e prome conteo ”.

Autoridad electoral a bisa cu e movimento politico di Lasso, Aliansa CREO-SUMA a pidi den su reclamo, dos accion cu no ta cuadra cu otro, pasobra no tin compatibilidad. Lasso a solicita e posibilidad di anula tur voto y tambe a apela e resultado. Cada un di e dos solicitudnan tin diferente rekisito, oportunidad, motivacion, tramite diferente y un base diferente. Pesey no ta posibel cu un tribunal por unifica tur dos den mesun proceso, pasobra esaki ta ilegal.

Den un comunicado Lasso a denuncia cu e decision aki di TCE a cera porta pa sistema di democracia. Y hende cu ta apoya Correa a demostra cu nan tin hopi “miedo pa sa e  berdad”.

“E husgado no ta acepta e solicitud cu Alianza CREO-SUMA a presenta, presentando pretexto procesal y asina ta nenga husticia na e ciudadanonan. Cu e decision ey nan a cera e via huridico, y a produci un apagon institucional”, Lasso a  bisa.

E movimento politico a bay na e centro electoral, cu ta e maximo organismo den e materia aki, pa asina soluciona e topico electoral, despues cu conseho nacional electoral a acepta un conteo nobo di 3.865 acta, cu ta representa 1.275.450 voto, alrededor di un 12% di voto di henter votacion y no un 100% manera Lasso a solicita.

E conteo a ser transmiti en bibo ayera na coliseo deportivo di Quito, pero Lasso a bisa cu e actividad ta un mentira pasobra segun Lasso tur dos organismo ta responde na deseo di gobierno. Dia 2 di april un ciere di encuesta a duna e victoria na Lasso,  mientras cu otro encuesta a duna Moreno como ganador.

E proyeccion y e bentaha di Moreno den conteo oficial di CNE a origina varios protesta na hopi ciudad di Ecuador. E protestanan  no a laga ningun herido o persona deteni.