(AP) – Menos di un siman despues di su fayecimento, a establece un fundacion cu e nomber Matthew Perry pa yuda e personanan cu ta lidiando cu adiccion.
“Den e spirito du Matthew Perry su dedicacion na yuda otronan batayando cu adiccion, nos ta cuminsa un biahe pa brinda honor na su historia pa medio di establece Matthew Perry Foundation, guia pa su propio palabranan y experiencianan y motiva pa su pasion pa haci un diferencia den mas bida cu ta posibel,” un declaracion di inauguracion a expresa diabierna.
E actor ganador di Emmy, ken a forma parti di elenco di e programa hit “Friends”, hopi biaha a papia publicamente tocante su problemanan di adiccion na droga y alcohol. E fundacion, cual awo ta aceptando donacion, a cita su deseo di ser recorda como un persona cu a yuda otronan cu e abuso su substancia aun mas cu su fama como parti di e programa aki.
E fundacion lo ser manteni pa e National Philantropic Trust y no a duna mas informacion ni detaye tocante e organisacion pa awo.
Manera a reporta anteriormente, Perry a ser declara morto cu 54 aña di edad despues cu paramediconan a haya su persona inconsciente den su cas na Los Angeles dia 28 di october. E autoridadnan te ainda ta investigando e causa di su fayecimento. Recientemente e resultadonan di examen di toxicologia a sali na cla unda a constata cu e no tabata intoxica na e momento di su morto, cual ta trece mas incertidumbre riba e causa di su morto. Tambe a informa cu aparentemente no a pasa hopi tempo desde cu Perry a fayece ora cu e paramedico a haya su persona, cual ta duna e impresion cu si e lo a ser haya mas pronto tabatin e posibilidad di por salba su bida.
Perry a forma parti di e elenco di e programa hit y sumamente conoci “Friends’, conhuntamente cu co-actornan Matt LeBlanc, David Schwimmer, Courteney Cox y Jennifer Aniston.
