Matthew morto Haiti mas cu 800. Aruba tambe ta yuda

E desastro cu horcan Matthew a laga atras na Haiti ta hopi mas grandi cu a pensa den e prome dianan ora e horcan a pasa. Awor ta papia di mas cu 800 morto y mas cu 1 miyon hende cu mester ayudo urgente (fuente:Reuters). For di Aruba tambe tin ayudo, segun Cruz Cora Aruba:

“Ministerio di Defensa di Hulanda ta planeando un operacion di ayudo humanitario y a aserca Cruz Cora Aruba y Krus Kora Korsou pa participa. Het Nederlandse Rode Kruis y representante di Hulanda na Haiti ta sostene e accion aki. Asina awe a cuminsa colecta tur material na Korsou y den transcurso di anochi lo yega Aruba pa busca material di Cruz Cora Aruba tambe cu ta ensera: 10 tent, 60 lona pa dak, y un total di 6000 liter di awa ( botter y jerrycans )entre Cruz Cora y Bohama. E material aki lo sali rumbo pa Les Cayes unda mas daño tabata tin na daknan di cas.”

Esunnen cu kier yuda por tuma contacto cu Cruz Cora 5822219 of  info@redcrossaruba.com.