Parehanan homosexual por casa desde 25 di mei na Costa Rica. Tur esaki debi na un fayo cu na 2018 e Corte Supremo di Husticia a establece pa drenta na vigor desde ayera diamars. Asina, esaki ta e prome pais di Centro America cu ta permiti e matrimonio pa parehanan di mesun sexo.
E pandemia no lo permiti pa haci marcha ni celebracionnan publico cu e organisacionnan cu ta lucha pa derechonan di comunidad LGBTI tabatin planea pa tuma luga. Pero e conmemoracion no a wordo opaca, e colectivo Si Acepto Costa Rica a programa un transmision riba television estatal y rednan social.
E colectivo Si Acepto Costa Rica a sigura na su cuenta di Twitter cu nan tin mas di 40 aña purbando pa e matrimonio igualitario entre parehanan homosexual por ta posibel na Costa Rica, aunke e prome pasonan a concretisa desde aña 2000, ora e Sala Constitucional di Corte a pidi pa Congreso legisla riba e tema, Luis Salazar, comisionado presidencial pa poblacion LGBTI a splica.
A pesar di e decision hudicial, e legisladonan a tarda un decada pa presenta proyectonan di ley pa esaki y ni un di nan a yega pa votacion. “Tin falta di boluntad politico, no tabatin interes pa defende e derechonan di e poblacion LGBTI, Salazar a sostene.
Na januari di 2018, despues cu Costa Rica a solicita su concepto riba e tema den Corte Inter Americano di Derechonan Humano (CIDH), nan a emiti un opinion consultivo na unda a ratifica cu parehanan homosexual tin e mesun derechonan matrimonial cu parehanan heterosexual.
Na augustus di mesun aña, Corte Supremo a tuma e huicio di CIDH pa declara no constitucional e norma di Codigo di Famia cu tabata impedi e matrimonio entre personanan di mesun sexo. Ademas, a pone un limite pa Congreso: e legisladonan awor tabatin un aña y mey pa crea e ley nobo cu lo garantisa e derechonan di comunidad LGBTI. Si nan tabata evita e discusion, manera a wordo haci desde aña 2000, e matrimonio igualitario lo drenta na vigencia automaticamente desde 26 di mei di 2020.
