No por tin un contraste mas grandi cu esun cu nos ta mira nos dilanti e siman aki: dos ministro ta haya henter un gabinete y nan parlamentarionan tras di e idea cu mester baha e ministro encarga cu Infrastructura y Medio Ambiente ‘cueste lo que cueste’ sin duna cuenta drechi na comunidad ta kico ta e problema, y e dos ministronan ta haci un atake abierto riba e principionan cu mester goberna nos maneho sostenible pa loke ta medio ambiente y naturalesa.

Na mes momento ta sali un Masterplan cu mester representa e ‘blueprint’ pa desaroyo sano y sostenible di Aruba den e añanan venidero. Un trabao hopi grandi, haci den poco tempo, cu lo por sirbi en berdad como guia pa nos desaroyo futuro, unda ironicamente ta menciona como un di e puntonan importante “un relacion sano y responsable cu nos medio ambiente y naturalesa”.

Nos a keda preocupa, mes preocupa cu nos tabata promer cu e plan a bira publico. Y esey no tin di haci directamente cu e esfuerzo y contribucion di esnan cu a contribui na esaki, pero nos ta keda preocupa pa e realidad politico cu riba su mes ta e promer cos cu mester cambia. Tanten nos ta den e situacion di awe, cu ta elabora un plan asina, y mientras tanto politiconan ta sigui elabora nan propio plannan ‘real life’ unda ta cera deal cu nos no mag sa, pero cu ta significa un asalto riba e naturalesa y medio ambiente na cual nos ta dedica tanto palabra bunita, nos no ta bay ni un stap dilanti.

Ta p’esey loke lo sucede diabierna awor den parlamento ta asina importante. No ta bay pa simpatisa cu e ministro cu ken nan kier core, pa e matrimonio di coalicion aki por keda existi. Ta bay pa e hecho cu na mes momento ta duna e mihor ehemplo posible pakico realmente ta dificil pa mira valor di un rapport asina, pasobra si e mentalidad di nos politiconan no cambia, y nan ta sigui insisti den pone cierto interesnan economico na promer lugar, anto nos no ta yega na nada. Anto e plan aki lo tuma mesun rumbo cu tur e otronan traha den ultimo 30 – 40 aña, di cual solamente a ehecuta e parti cu tabata conveni esnan cu placa pa paga un proyecto y… paga e politico. Kico esaki ta implica, si nos kier avanza di berdad? Cu nos lo mester crea condicion pa esaki por tuma lugar, y esey ta haci cu nos mester haya un manera pa no automaticamente laga e politiconan cu tin plan pa gana placa hunto cu esnan cu kier proyecto cu no ta beneficia nos, haya nan gana sin mas. Y esey ta requeri hopi.

Pa cuminza, mester tuma esnan cu ta señala e asuntonan aki na serio. Den e caso concreto cu ta trata proximamente den parlamento, pakico no a tuma e ministro concerni na serio? Lo no tabata normal si no a core condena e mandatario pasobra el a tribi di mishi cu ‘cierto hende di confianza’ di Fulano? Esaki ta e cosnan cu ta dificil haya atencion pa nan den e tipo di rapportnan aki, cu ta describi tur e fenomenonan cu ta rondona e problema, pero no ta bay tanto den detaye tocante e problema mes: e forma con den e pais aki tin un otro matrimonio, o ban yam’e un relacion extramarital, cu a lo largo di añanan ta resulta mas fuerte cu cualkier otro: e relacion entre poder politico y poder economico. Esey no ta algo unico pa nos pais, e ta sucede den tur otro tambe. E diferencia ta cu nos ta atende e asunto na un manera diferente. Nos no ta busca un manera pa crea balance den e cosnan aki, pero ta permiti cu tras di cortina, y haciendo uso di un sistema legal defectuoso, acompaña pa un aparato di supervision mas defectuoso ainda, por traha deals entre politico y empresario, cu ta sali na luz di dia despues cu e daño ta haci caba, y nos ta paga semper ‘los platos rotos’. Y esey a pesar cu nos ta parti di un Reino Hulandes unda hopi di e busqueda di balance entre e podernan aki ta mihor regla, pero nos politiconan no kier e modelo cu mas supervision ey. Mesora nan ta cuminza grita cu ‘nan ta mishi cu nos autonomia’, e lema magico pa percura cu no mester duna cuenta. Mayoria di nos sa mihor y no mester keda acepta e anarquismo politico aki.

Pero no ta un ministro den pleito cu su coleganan so mester tuma na serio. Den un lugar chikito manera esaki ta dificil imagina cu tin organisacion civil fuerte cu por ta un ‘sparring partner’ di peso pa gobernacion, pa por coregi procesonan cu ta tuma un rumbo robez. En general ta mira nan como ‘fastioso’ y ta busca tur manera pa corta nan paso, envez di yuda nan den nan papel di contrapeso. Pero pa bo haci esey, bo mester pensa diferente. Cu e actual actitud y pensamento cu ta esun cu hopi placa y hopi poder so por paga e politico, nos no por avanza nunca. Y, ban ta franco, no ta placa pa campaña nan tur ta busca? Ban cuminza cu cambia esey.