Minister Otmar Oduber ta indica cu e tendencia di criminalidad creciente ta keda un punto di preocupacion specialmente mirando su efecto negativo riba turismo. Durante e ultimo 2 pa 3 aña y sigur durante su ultimo bishita siman pasa na oficina principal di Royal Caribbean Cruise linesy tambe Carnival Cruise lines, cu ta e liñanan cu ta trece mas tanto pasahero Aruba, ta bin dilanti e preocupacion pa futuro mirando e tendencia negativo cu criminalidad riba nos isla ta aumentando. Mas y mas e bishitantenan ta keha riba e incidentenan cu ta tuma luga demostrando un aumento den criminalidad. Minister Oduber ta indica cu mester atende cu esaki pero na mes momento a mustra riba e hecho cu cuerpo policial, specialmente den e areanan turistico den nos centro di ciudad, pues nos waf y downtown area, ta haci un bon trabou. Sr. Oduber ta mira cu e unidadnan aki ta purba percura cu actividadnan na waf ta bou di control cu tin dia tin entre 3 pa 4 mil turista y otro dianan ta yega te 9 pa 10 mil hende. Tambe e mandatario a elogia e trabounan cu ta wordo haci pa e aspecto di trafico na e momentonan peek cu un cantidad grandi di barconan na nos waf.
Sinembargo for di e liñanan crucero e preocupacion t’ey y a mustra esaki cu estadisticanan unda mas y mas kehonan ta drentando. Locual mas ta resalta ta turistanan cu ta wordo horta riba beachnan.
Minister Oduber a pidi e liñanan pa un rapport detaya cu e areanan specifico, pa asina por tuma accion. “Kisas a traves di Aruba Hotel and Security Foundacion y den colaboracion cu Cuerpo Policial lo por mira si por brinda mas sosten den e areanan aki.” e mandatario ta comenta. “E ta un punto di preocupacion y nos sa tambe cu e liñanan Crucero ta tuma e observacionnan di nan pasaheronan hopi na serio, na momento di fiha nan destinacionnan na momento di planifica e iterinario di nan barconan.”
Recientemente ATA a colabora cu AHSF cu un suma di 750 mil florin pa percura pa controla netamente e aspecto aki. Di parti oficina di turismo nan ta habri pa sigui duna un man si esaki ta necesario. E preocupacion ta halto. Minister Oduber ta indica cu esaki no ta prome biaha cu su atencion ta wordo solicita pa e problematica aki, pero e biaha aki e preocupacion a keda demostra cu cifra tambe. “Mester pone atencion na esaki pa evita cu e ta sigui escala cu Aruba por haya su nomber atacha cu tur e consecuencianan negativo pa nos Turismo.”
Aruba ta netamente un di e destinacionnan cu miho ta score den siguridad. Mester percura pa esaki keda asina y no pavia di e aumento di incidentenan manera robo cu ta subi cabes, daña e reputacion aki. Aruba su dependencia riba Turismo, economicamente ta hopi halto. Mester traha riba cualkier indicacion cu lo por tin su efectonan directo riba nos unico pilar economico actual.
Fuente: comunicado minister turismo
