Na mei 2019 frontera, tanto aereo como maritimo entre Aruba y Venezuela a cera y dia 1 di mei Aruba a habri frontera maritimo. Te ainda e frontera aereo entre e dos pais aki ta cera sin ningun indicacion cu esaki lo por habri pronto. Pero esaki no a kita cu turistanan Venezolano no a bishita e isla.
Segun e noticiero local, Noticia Cla, na november aña pasa 3,249 turista Venezolano a keda registra na e isla. Esaki ta 28.7% mas hopi compara cu e 2,524 registra den e mesun luna e aña anterior.
Turistanan Venezolano por yega e isla a via otro destinacionnan, esun mas comun ta nos hermana isla Corsou. Aki tambe e cantidad di turista Venezolano a aumenta.
Oficina di Turismo di Corsou a informa cu durante aña 2024 15,916 turista Venezolano a bishita e isla, cual ta representa un aumento di 177% compara cu aña 2023. Segun informacion publica pa e oficina, Colombia y Brazil a ocupa e prome luga y Venezuela a keda na di tres luga.
Dia 19 di december ultimo autoridadnan di aviacion di Aruba a extende cu tres luna mas e prohibicion di vuelo comercial di pasahero, carga y aviacion general for di y pa Venezuela. Esaki ta nifica cu e frontera lo keda cera te maart, cu posibilidad di otro extension di e ciere.
Aunke ainda no tin ningun indicacion di un posible reapertura di e frontera, e poco speransa cu tabatin pa esaki poco poco ta disparce teniendo na cuenta e situacion critico cu e pais bisiña ta pasando aden na e momentonan aki.
