Mas trahadonan ta bati na porta di sindicato; SEPPA ta representa trahadonan di Renova Spa

E aña aki a bira uno caminda diferente empresa cu no tabatin representacion sindical di nan trahadonan a haya presencia di sindicato, y esaki tabata e caso di Renova Spa.

Diahuebs ultimo un grupo di 22 trahado di e compania Renova Spa cu derecho di voto a participa den un referendum cu a tuma luga den edificio di ex TNO. Aunke e grupo di trahado ta uno relativamente chikito, e cantidad di trahado no ta determina si e referendum ta wordo realisa si of no. Incluso e por ta menos cu 22, ya cu e ley di referendum no ta specifica riba cantidad di trahado.

Oficina di Mediador di Gobierno tabata encarga cu organisacion di e referendum aki. Segun Mediador, Anselmo Pontilius, sindicato SEPPA tabata esun cu a pidi e referendum aki. Pontilius ta wak cu trahadonan di diferente sector ta haya importante pa organisa nan mes, entre otro pa e medida cu e dunado di trabao ta tuma debi na e pandemia.

Den e referendum di Renova Spa e resultado tabata lo siguiente: For di un grupo di 22 trahado cu por haci uzo di nan derecho di voto, un total di 14 di nan a vota pa e unico sindicato cu a participa den e referendum aki, esta SEPPA. E referendum a tuma luga entre 8:30 di mainta te cu 10’or di mainta. Den e caso aki SEPPA a haya e mayoria di e mita plus un y consecuentemente e sindicato aki a haya e derecho pa representa e trahadonan di Renova Spa.

Situacion

SEPPA tin un tarea pa sinta na mesa cu gerencia y seguramente esaki lo tuma luga pronto, ya cu tin decisionnan cu e compania a tuma den un situacion dificil.

Nan ta opera dos espacio di spa, un den Riu Antia y otro den Riu Palace. Pero actualmente nan ta opera den Riu Palace, locual a haci cu e grupo di trahado a wordo intercambia -segun Mediador di Gobierno- pa percura cu nan tin actividad laboral pa haci.

Pero ta evidente cu e compania a sufri consecuencia serio debi cu e hotel unda nan tin un sede ta completamente cera. “Si bo tin poco ocupacion bo ingreso lo ta menos,” el a declara na e matutino aki.

Esey no ta kita afo cu e sindicato tin e tarea aworaki di sinta na mesa y mira cual ta e decisionnan cu e compania a tuma, entre otro efecto riba salario, y tambe e cantidad di dia den siman cu nan personal ta traha.

Mediador a splica cu e ley ta bisa cu e dunado di trabao tin un obligacion legal pa yega na un acuerdo di contracto colectivo (CAO). Sinembargo e por ta bon skirbi, pero e hecho ta cu e negociacion di un CAO e obstaculo ta, e contenido cu mester wordo negosha, y esey por tarda.

Mirando e situacion cu nos ta pasando aden, oficina di Mediador di Gobierno su conseho na e sindicato y dunado di trabao ta pa sea mas realistico cu ta posibel denter di e circunstancia actual, mirando cu nos ta pasando den un super crisis.

Trahadonan

Vivian Orman-Orcadio kende ta un trahado di e span aki a bisa cu un grupo di trahado a bin vota den e referendum aki pa haci uzo di nan derecho pa busca representacion sindical for di SEPPA.

Esaki ta e prome biaha cu nan a participa den un referendum, ya cu nan ta un team chikito di trahado. Nan no ta contento riba cierto decision cu a wordo tuma den e compania aki, principalmente den e situacion actual cu nos ta pasando aden debi na e pandemia di Covid.

“Tin hopi inhusticia ta pasando. Pero e manera tambe con nan trata nos, y nos kier tin oido di nan. Nos derechonan tin ora ta wordo trapa, ” el a bisa. P’esey nan a dicidi di busca un sindicato ta defende e derecho di e trahadonan.