Ta ora pa MEP, RAIZ y AVP acepta cu semper a pusha problema di Aruba pa futuro. Asina lider MAS ta opina. Y COHO lo yuda cu por fin por reforma Aruba pa haci nos pais mas fuerte. MAS a campaña cu e landspakket y ta kere den e reformanan. Pero locual lider di MAS drs. Marisol Lopez Tromp no por compronde con fraccion di MEP y RAIZ cu ta sostene Gobierno por ta contra e ley di consenso di Reino COHO.

Asina e lider politico den oposicion a bisa despues di e reunion di IPKO, e encuentro Interparlamentario di Reino cu a tuma luga na St. Maarten, unda particularmente a discuti e ley di consenso di Reino COHO, pero tambe e ley di consenso di Reino, Raft, cu ta hisa e nivel huridico di e supervision financiero di Aruba (red. e Raft ta conta pa Aruba so, ya e supervision financiero di Corsou y St. Maarten ta regla pa ley di consenso di Reino).

Marisol Lopez Tromp ta enfatisa cu mescos cu ta e caso di Aruba, Gobiernonan di St. Maarten y Corsou tambe a firma pa e leynan aki bin. “Tur tres a bay de acuerdo cu e concepto manera cu e ta awor aki. Ta na Parlamento su turno pa duna su punto di bista riba esaki. Den e siman cu ta bin, cada fraccion den Parlamento lo pone riba papel, preto riba blanco, den e relato, kico ta su postura. No solamente riba e reformanan pero tambe e leynan cu tin cu percura pa nan keda ehecuta.”

Kico ta COHO

Segun Marisol Lopez Tromp mester considera COHO, e Organo di Reforma y Desaroyo, como un vehiculo. Un entidad pa yega na reformanan cu pa decadanan mester a keda implementa, pero tur Gobierno a keda pusha dilanti. “E instrumento aki, esta e vehiculo aki manera con e ta poni riba mesa, lo mester percura cu e reformanan aki por tuma lugar riba un forma structura.”

Fraccion y partido MAS ta convenci cu mester di e entidad aki.

Marisol Lopez Tromp a cita e propio Prome Minister di Aruba, mr. Evelyn Wever Croes kende a negocia cu Hulanda y finalmente a bay de acuerdo cu e reformanan y e vehiculo COHO. “Prome Minister a bisa den su ultimo conferencia di prensa, cu COHO ta e ley cu ta rigi kico ta pasa si Aruba no cumpli, ki sancion lo tin. Tambe el a bisa cu e ley ta rigi e sancion si Hulanda no ta cumpli y kico ta e sancion pa e esey. Naturalmente nos di MAS ta di opinion cu pueblo mester carga e ley y cu mester keda implementa den forma realistico.”

Pa tal motibo mes, fraccion di MAS a bisa cu ta preparando su preguntanan riba e ley, punto di bista, y puntonan di mehoracion pa loke ta e conceptonan di ley di consenso di Reino. Pueblo lo haya e puntonan di bista pa lesa. “Nan no ta punto di bista nobo, nos tin nan hancra caba den programa di campaña y programa di partido y MAS a haya dos asiento den forma transparente, bisando cu nos kier reforma.”

Dos lenga

Pero, locual ta hala atencion di lider di MAS ta cu Prome Minister Evelyn Wever Croes ta papia cu “dos lenga. Pasobra mientras cu el a firma caba, el a acorda dor di pone su firma bao di e proposicion di e ley di consenso di Reino (COHO) aki; ta mira na mesun momento cu ora e ta papia cu Secretario di Estado Van Huffelen e ta bisa cu e ley manera cu e ta awor aki, e ta de acuerdo cune.” Prome Minister Wever Croes a bisa publicamente den presencia di van Huffelen cu “Nos a bay de acuerdo cu e textonan (di e proposicionnan di leynan di consenso di Reino) y nos lo haci nos esfuerso maximo pa cumpli cu e condicionnan.”

P’esey mes pa lider di MAS e ta prueba cu Evelyn Wever Croes no ta un hende cu ta papia cu honestidad, pasobra den un recien declaracion publico el a bisa net lo contrario. “Esta, cu e no ta kere cu mester bin COHO, cu e no ta kere cu e entidad mester bin pa ehecuta e reformanan, pasobra e ta kere cu nos mes por.” Prome Minister literalmente a bisa algun siman pasa cu “e areglonan den e ley di COHO ta duna impresion of e balans di poder di COHO ta hopi na banda di Hulanda y esey ta locual mayoria persona tin problema cu e ley di COHO. Ami personalmente tambe tin problema cu esaki.”

Segun Lopez Tromp, e ta logico cu Aruba kier pa su mes por. “Pero a keda demostra den transcurso di tempo cu loke tin awor aki, e situacion cu nos ta den, a bin pasobra nos no a cumpli cu locual nos mes como Pais Aruba, como Gobiernonan cu nos lo ehecuta. Nos di Mas no ta kere cu mester keda pusha dilanti e problemanan cu Aruba tin. A yega momento pa ehecuta nan den forma structura. Mester stop di pusha problema pa yiunan y nietonan.”

E lider di MAS a mustra cu e ta compronde cu tabatin e crisis di COVID-19, pero na mesun momento e pandemia a habri wowo di hopi hende pa e problemanan na Aruba y “na e momentonan aki ta importante pa no solamente wak e postura di Gobierno, pero tambe di Parlamento di Aruba y di otro paisnan den Reino.”

MEP y AVP a brasa otro

Den e ultimo dianan a mira con partidonan MEP y AVP cu ta opositor di otro, a uni riba e tema di COHO. “Eynan si nos a mira con nan a brasa otro, pasobra aparentemente tur ta de acuerdo cu no mester bin e entidad manera cu e ta awor aki, pasobra ‘nos mes por.’ Hasta nan ta contra e leynan di consenso di Reino. Nos por discuti bay y bin. Pero esencia ta cu pa por ehecuta cambionan structural pa Aruba a termino largo mester di un vehiculo manera COHO.

Marisol Lopez Tromp ya no ta kere cu por depende di Gobierno of eleccion nobo pasobra, tur biaha despues di un eleccion na Aruba ta para e reformanan cu a cuminza traha riba nan. “Nan no ta sigui. Esey a pasa den tur e añanan nos tras. Si berdad kier pa nos pais ta mas resiliente, pa por tin situacion financiero saludabel, anto mester cumpli cu locual bo a priminti, cumpli cu e consehonan cu bo a ricibi di CAft, cu ta mustra kico e pais por carga. Y no manera con el a sosode awor aki, cu Gobierno cada biaha tras di otro ta haya critica por escrito di e colegio aki, pasobra no ta cumpli cu locual el a priminti.” Marisol Lopez Tromp a duna como ehempel e recorte di 12.6 porciento di salario di empleado publico y maestronan. “Te cu awe, Gobierno ta kita e porcentahe di esun cu ta traha p’e, su sodo, su trabao. Ta kita e placa aki di trahado, pero Gobierno mes no ta baha su gastonan structural, no ta stop di malgasta, no ta stop di nombra su mesun hendenan cu no ta cualifica pa cierto funcionnan,” e lider di MAS a enfatisa. Tur rapport ta mustra e realidad cu Gobierno no ta tuma paso pa structuralmente baha gasto. “Awor claro, ta con anto por kere cu ‘nos mes por,’ si nos ta keda hala problema pa despues. Den e caso aki, manera Minister President ta papia cu dos lenga, ta bira hopi importante pa Parlamento asumi su responsabilidad y mustra cu di berdad nos kier yuda Aruba bay dilanti, haciendo uso di un entidad cu ta bay yuda cu reformanan ta keda ehecuta den un forma cu pueblo por carga y cu realmente ta sinti sigur cu no ta keda pusha problema pa futuro, pero cu ta haci “nos pais uno mas fuerte, particularmente despues di e retonan cu nos a pasa den.”

Rol di RAIZ

Un punto interesante den e proceso ta cu RAIZ tambe ta contra e ley di consenso di Reino COHO. Pasobra miembro di e mesun partido, mr. Carlos Guaimo ta un di e arkitectonan di e ley. E ta e consehero huridico riba e tema aki pa Prome Minister Evelyn Wever Croes. Es mas, durante e reunion cu Parlamento a tene cu porta cera, mr. Guaimo tabata un cu a splica e legisladornan kico ta e cambionan y con e ley ta hinca den otro. Pa Marisol Lopez Tromp, esaki ta ilustra un conflicto di interes y no ta duna e imagen di transparencia cu RAIZ a priminti.