Pareu cu e evento di AVP na Renaissance Convention Center no mucho leu na Dependance di Censo, e ultimo partido cu tabata falta haya firma tabata ricibi hende te 8or y mey. Partido ABO a haya total 487 firma, pues a keda falta 91 pa por a participa na eleccion.
Lider di partido ABO Elton Lioe-A-Tjam ta expresa cu e ta contento si, pasobra ‘nos a mustra cu nos por y cu democracia no mester paga cu miyones. Democracia ta di nos tur’.
Sr. Lioe-A-Tjam ta splica cu ni cu e otro partidonan nobo si a logra pa participa cu eleccion, ‘nos di comienso a bisa cu nos ta keda. Nos lo sigui conscientisa e pueblo pa scoge gobernantenan integro’.
“Esaki ta nos meta berdadero. y nos a logra esaki caba.”
Den nos edicion di ayera Milton Ponson di Rainbow Warriors International a sclama pa pueblo firma pa e ultimo partido, argumentando cu esaki lo trece mas variedad di escogencia na tempo di eleccion.
Sr. Lioe-A-Tjam a bisa cu ‘nos mes a ripara cu cierto hende ta bin sostene cierto partido nobo, y esaki ta nan decision. E hendenan cu nos tin cu nos ta hende cu en berdad ta sostene partido ABO’.
“Nos no ta warda pa niun partido grandi yuda partido ABO, pasobra nos kier un cambio.”
Redaccion a pidi comentario di un persona cu a bay sostene e partido na ultimo momentonan.
“Mi tabata kier a firma pa un partido chikito desde comienso pero mi kier a wak cua di nan lo tin mas mester di mi sosten. Pasobra mi a nota cu cierto partidonan a haya nan firmanan basta lihe.”
Den opinion di e persona anonimo, ‘mas hende bin sostene partido chikito mas partido por participa den eleccion. Asina ki nos tin mas representacion di e comunidad den e eleccion’.
