Den un reunion urgente cu a tuma luga dialuna atardi, 9 sindicato a uni den nan protesta contra e cambio di ley laboral, specificamente cu gobierno kier kita articulo 1613X di Codigo Civil. Esaki ta nifica cu kier caba cu e periodo di prueba di 2 luna pa asina dunado di trabou por warda hasta 2 aña pa despues mester duna trahado contract indefini.
Segun NoticiaCla, banda di FTA y Seppa cy ya a protesta, awor tin otro sindicato, esta UEA, STT, Siwa, ABV, Sada, Alvast y Simar cu tambe ta mustra nan malcontento cu e cambio proponi.
Minister di Labor Paul Croes a reacciona den un comunicado awe nochi ainda, bisando cu ainda ta trahando riba e cambionan, cu ‘alrededor di 15 cambio den e ley cu ta wordo proponi y un di esunan mas discuti ta e articulo 1613X’. E ta bisa tambe cu su posicion ta basa riba ‘consehonan di Conseho Consultivo, raportnan di IMF y expertonan juridico den leynan laboral’. “Na momento cu nos recibi e cambionan proponi manera ami como Minister a propone, lo mi presenta esaki na Conseho di Ministernan pa asina discuti y finalmente manda esaki Parlamento di Aruba.”
