Minister Presidente, Evelyn Wever-Croes a anuncia algun cambio den e fase tres di flexibidad pa reactiva nos economia y actividad normal.

Ta asina cu cuminsando awe tin algun actividad cu ta wordo permiti atrobe. E prome cu sigur lo trece alegria pa nos grandi interna den cas di cuido. E mandatario a anuncia cu cuminsando awe 10 di juni ta permiti bishita na cas di cuido, pero segun protocol estricto.

Sharine Koolman di DVG a agrega cu unabes cu cas di cuido ta habri, nos mester ta consciente di e vulnerabilidad di nan clientenan. Pero tin algun di nan cu ta ofrece cierto servicio cu e grandi por keda den dia y realisa cierto actividad, y anochi nan ta bay cerca nan famia.

E ta remarca cu den e caso aki tin diferente protocol depende di cada servicio, y tambe pa e trahadonan y esunnan cu ta bay bishita. Awe pa 7or anochi via TeleAruba nan ta invita pa hefe di departamento di cuido di grandi por duna mas splicacion detaya di kico tur protocol ta encera.

Otro actividad.
Nan ta permiti deporte paden cu excepcion di deporte di contacto. Conferencianan y sitio di reunion por cuminsa opera bek cu implementacion di e protocol di distanciamento y ventilacion di espacio.

Otro actividad cu den e fase aki ta wordo permiti ta bar y club nocturno, pero teniendo cuenta cu orario di ciere y cumpliendo cu protocol exigi pa autoridad di salubridad. Tambe centronan di actividadnan social y fiesta ta permiti pa habri den e fase aki.

E mandatario a anuncia cu e orario di ciere pa tur establecimento, tanto pa club nocturno y restaurantnan ta bira 11or anochi. E ta conta tambe pa bar, ya cu nos ta den e crisis ainda. Te ainda no tur sector di nos economia ta habri, entre nan casino, deporte di contacto y eventonan publico.

Prome cu el a anuncia e cambionan anterior den fase tres, el a expresa su preocupacion riba comportacion di nos comunidad pa atende cu tur regla di higiena y distanciamento social. Esaki a pesar cu 11 dia pasa e ultimo pashent cu tabata activo a test negativo na Covid. Y ainda nos ta na cero positivo, y nos tin mas cu un luna cu no tin un caso nobo.

E panorama aki ta mustra cu e aspecto di salud relaciona cu e virus nos tin’e domina, y esaki ta algo cu ta tene nan hopi satisfecho. “Nos no ta manera nos mester ta, pero nos ta den un bon caminda,” el a bisa.

Sinembargo el a referi cu tin comportacion cu ta preocupante specialmente durante fin di siman a base di informacion di polis. El a haci un apelacion na comunidad pa ban uni y mantene na e dos principionan: Disciplina y cautela, pero sin miedo y cu curashi. Disciplina pa medio entre otro di mantene e distancia, a pesar cu nos tin cero caso positivo.

Un motibo tin di haci cu nos no tin garantia cu e virus aki no ta na Aruba mas. Ainda nos tin 77 persona den cuarentena cu a bin di paisnan unda tin presencia di e virus. Un mayoria di nan a bini for di Hulanda. E grupo grandi cu dos siman pasa a bin di Colombia a sali for di e cuarentena caba.