No ta ambiente propicio pa negocia…
Presion pa yega na un deal encuanto reapertura di e refineria ta aumentando. Pa un parti e presion ta gobierno mes a impone riba su mes, creando tanto expectativa cu mester cristalisa ainda. Pero esey no ta tur, presion ta bin di otro banda tambe. Por ehemplo di e ultimo carta di CAFT tocante nan opinion riba e version aproba di presupuesto 2016. Mientras gobierno ta gaba contenido di esaki, esnan cu a lesa e documento aki, lo por a yega na un conclusion contrario. Realmente CAFT ta bisa entradanan di gobierno pa 2016 no tin un base solido ainda, ya cu hopi ta depende di e reapertura anuncia. Ta p’esey ta bay di acuerdo pa na luna di mei proximo, sinta y analisa e situacion di e momento ey. Si acaso e reapertura no bira un hecho, gobierno lo mester bin cu otro medida anto pa cubri e buraconan cu ta aparece den su presupuesto. Esaki por zona manera un advertencia di ‘wak pa bo tin un plan B, eventualmente un plan C’.
Pero por lesa esaki di otro manera tambe y esey ta cu ta bisa:”wak pa bo plan A funciona!” Ta parce cu no solamente na Aruba, pero na Hulanda tambe tin hopi hende interesa pa habri e refineria, ‘no matter what’. Kico tin tras di tur e presion di tur banda pa reapertura, talbes interes Hulandes na Venezuela? No ta tende ningun comentario cu Citgo y PDVSA na e momento aki ta entre e partnernan comercial menos deseabel na mundo.
Mester bisa si cu CAFT den su carta ta recomenda laga traha un ‘milieueffectrapportage’ (MER) pa por tin un idea cuanto e consecuencianan ambiental y por lo tanto financiero por ta pa Pais Aruba, ora e propiedad pasa pa esaki. Pero esey no mester significa nada; nos a mira yen di MER den pasado cu a ser traha ‘tailor made’ segun deseo di esun cu ta laga trahe…
Sin embargo, ban pensa optimista y kere cu e evaluacion aki lo describi e riesgonan cu Aruba ta core ora nos asumi tur responsabilidad pa daño ambiental, exonerando Valero di tur responsabilidad pa daño ambiental te awor. Fuera di esey, mester sa kico ta e condicionnan pa e operador nobo pa e dañonan den futuro. Esey no ta encera solamente emision di gas toxico, sino tambe bentamento di desperdicio riba e tereno, den lama y cualkier otro luga riba nos teritorio. Si nos observa e problemanan continuo cu tin na Curaçao cu e empresa madre di Citgo, esta PDVSA, ta dificil pa kere cu nan ta bay adopta un regimen di control y limpiesa, cu cual nan no kier cumpli na e isla ruman.
Manera cu e fecha limite ta yegando mas cerca, mas grandi e tension ta bira y mas grandi tambe e boluntad pa yega na un acuerdo, tambe si mester tira hopi awa den biña. Cu e riesgo cu nos ta haya un acuerdo cu mas a largo plaso por ta di gran desbentaha pa Aruba. Straño ta keda cu nos no ta tende nada di e partidonan den oposicion den e dianan aki. Lo ta logico, a pesar cu e dos partidonan representa den parlamento a expresa nan aprobacion pa reapertura, sigur di punto di bista di efecto riba empleo y diversificacion di economia, cu nan lo pone condicion pa e acuerdo cu Citgo/PDVSA no bira un ‘sell out’ di interes di nos pais. Pero ta parce cu nan ta desea di duna gobierno un man liber pa negocia, en bes di pone condicion bon cla pa limita consecuencia negativo pa nan mes tambe, si nan ta aspira di ta den gobernacion den futuro nan mes.
En todo caso, drentando den e recta final pa yega na e fecha limite, no por bisa cu esaki ta e ambiente mas adecua pa negocia, ora tin tanto interes legitimo di Aruba na riesgo, mientras cu gobierno por ta demasiado enfoca riba yega na e deal con cu ta, pa por conta cu e entradanan palabra, y di manera aki evita un confrontacion cu Hulanda atrobe mas den aña tocante su presupuesto. Y pakico un confrontacion? Pasobra gobierno a haya como sugerencia di CAFT, si acaso e refineria no habri, pa introduci e ABB tog, of aumenta e BAZV, ambos alternativa totalmente no atractivo pa bay implementa, na solamente un aña di eleccion. Pa corona obra, CAFT a duna gobierno di comprende cu e no por bay busca prestamo pa yena e buraconan den presupuesto, sin recomendacion positivo di CAFT. Bao di reglanan di Statuut, gobierno tabatin mester di aprobacion caba pa prestamo pafo di Reino, pero cu e ley di CAFT vigente, a sacrifica tambe e autonomia pa busca prestamo dentro di Reino. Articulo 15 di e ley CAFT ta describi bon cla cu tur prestamo ta suheto na aprobacion. Ta p’esey a duna awor aprobacion solamente pa fia pa renoba prestamo cu ta madura, pero no pa debe nobo. Algo a sucede den e combersacionnan reciente cu CAFT a haya necesario pa adverti gobierno kico e reglanan nobo ta…
