Segun e resumen di ayera di DVG pa loke ta trata casonan di Covid-19 riba nos isla, por a nota cu mas persona ta sigui recupera. Ayera, un total di 40 persona a recupera.
Ademas DVG a informa cu a realisa un total di 217 test, di cual 133 tabata bao residentenan na laboratorio di hospital. Di esakinan tabatin un tasa di positivo (‘positivity rate’) di 13%, cual ta un total di 17 caso nobo.
E total di casonan activo a baha cu 23 persona y a keda ayera na 401. No a registra mas morto pa e malesa, pa cual e cantidad di fayecido di Covid-19 a keda na 21.
Di su banda, hospital ta informa cu tin den total 25 persona interna cu malesa di Covid-19. Di esakinan, 9 ta den unidad di cuido intensivo mientras cu 16 ta isola riba piso general.
“Pa por sigui maneha e transmision di covid ta importante pa comunidad ta alerta y na prome indicacion di sintoma tuma contacto cu dokter di cas pa por haci un test. Door di isola e casonan positivo nos por controla e virus y stop e di sigui plama.
Ban sigui cuida, Aruba ta conta cu bo pa sigui maneha y controla e virus di Covid-19”, DVG ta conclui den su comunicado di prensa.
