Esey ta e solucion?
Si cos sigui asina, nos ta bay eleccion na september venidero cu un lista bastante grandi di partido politico cu ta busca aprobacion di e electorado. Por tin pa e tempo ey un cantidad considerabel di partido nobo, of partido cu te awor a purba sin exito y ta bolbe bay guera. Esey riba su mes no ta garantia pa exito. Nos a mira den eleccionnan reciente cu hopi di e partidonan chikito ta keda… wel, chikito. Esaki tin mas cu un motibo. Mayoria di nan no tin e recursonan pa competi cu e grandinan den cobertura bon den e gran cantidad di medio di comunicacion cu nos tin. Tanten ta trata di e espacio gratuito cu medionan ta ofrece, nan ta comodo, pero ora campaña bira cayente y mester recurso grandi pa demostra presencia den publicidad, e storia ta cambia. Hasta nos por a nota den ultimo eleccion cu e exceso di recurso cu e partido den gobierno a demostra, a laga tur otro partido leu atras.
Naturalmente tabata trata tambe di otro asunto, manera exceso di material di propaganda, pago pa pone bandera na cas, pa pone borchi grandi banda di caminda, tene fiesta grandi cu banda, cuminda y bebida, etc. Pero esey no ta tur. Tin cos cu e partidonan mes mester tuma na cuenta pasobra esey ta loke nan mes por mehora. Kico asina? Bueno, pa cuminsa hopi biaha e partidonan ta keda pega den presenta nan mes como partido di ‘issues’. Nan ta scoge un o dos tema riba cual nan ta keda bati henter ora.
Asina den pasado recien nos tabatin e asunto di ‘vakminister’ cu a logra cierto discusion, pero no esun cu e partido tabata desea. A cuminsa cuestiona ‘legitimidad’ di e fenomeno di vakminister mientras cu conocedo di e materia sa cu esaki ta un asunto absurdo. Pakico? Pasobra cualkier partido o gobierno ta nombra cuanto un vakminister cu nan ta desea, esey ta nan prerogativo, punto. E argumento cu nos ta tende hopi biaha den pueblo cu ‘bo mester a core campaña, subi lista pa bo por bira ministro’ ta mes ridiculo como absurdo y no tin ningun base den ley. Cu awor e partido den gobernacion a nombra dos ministro profesional den nan gabinete, esey ta nan mester sa y e ta perfectamente legitimo. Ta bay pa con nan ta haci nan trabao, y con parlamento ta controla nan trabao.
Realmente lo ta mas saludabel pa nos sistema politico si nos bay mas ainda den direccion di gabinete di profesional, mientras cu esunnan cu e votonan ta sinta den parlamento pa controla si nan ta haci loke a manda nan haci. Asina realmente e sistema ta intenciona, pero ta hustamente e sistema manera el a bira, unda tur hende cu hopi voto ta bira ministro, lagando e back bencher nan den parlamento, ta haci cu e poder ehecutivo ta todopoderoso y hasta ta dicta ki dia parlamento ta reuni, si ta tene reunion pidi pa oposicion, con ta vota, etc. Ta e cosnan aki ta haci cu nos sistema parlamentario e farsa completo cu nos conoce awe.
Kico ta loke un partido chikito por haci bon, a pesar di nan tamaño? Percura pa bo tin un analisis completo y bon prepara riba tur asunto y aspecto mayor, pa bo por haci bo opinion resona na momento oportuno. Unabes cu un partido chikito label su mes como partido di issue, ta bira dificil pa kita e imagen ey. Esey ta exigi si, cu bo mester por conta cu un ekipo chikito pero experimenta cu ta cubri mayoria di asunto al caso. A pesar di ta chikito, bo no por sin investigacion adecua riba e terenonan mayor di gobernacion pa por tuma bo na serio. Esaki no semper ta e caso, y pueblo tin un bon olfato pa esaki.
Esey ta tur? Cu esey ta bay logra exito? Mundo no ta asina simpel; un bon campaña ta exigi hopi mas. Manera un of un par di bon consigna cu ta resumi na un manera cla kico bo ta trece dilanti. Y ainda bo ta keda den desbentaha compara cu partido grandi, mas ainda ora nan ta den gobierno, cu acceso na un gran cantidad di campañado paga cu placa publico, coriendo cu vehiculo cu nos ta paga, uzando celular cu nos ta paga, etc.
Cu esey anto nos por yega na e conclusion cu ta casi imposibel pa derota un partido den gobernacion? Nos no ta kere esey, y nos tin historia na nos banda. A pesar cu ta bisa cu e votado Arubano ta keda cu e partido cu nan famia a scoge, nos por a experimenta varios derota ‘landslide’ pa partidonan den gobierno. Nos no ta pronostica loke ta bay pasa, pasobra nos no ta na nivel di mirado di carta. Loke si nos ta señala ta cu e surgimento di varios partido nobo ta señal di un cierto malcontento cu politica en general y specificamente cu funcionamento di gobernacion y parlamento. Esun cu yega na vocifera e problemanan cu pa e votado ta conta na un manera comprendibel, tin e yabi pa exito.
