E cantidad di permiso pa hende por subi Mount Everest ta subiendo, causando morto pasobra hopi hende na mesun momento ta subi sin experiencia di alpinismo, y ta stroba pa otro sigui.
11 persona a muri e temporada aki, e cifra mas halto desde 2015. Ta kere cu mayoria a sufri mal di haltura, falta di aire pa medio di haltura, algo cu por causa dolor di cabes, sacamento y confusion mental.
Antes, e cumbre tabata accesibel pa alpinistanan elite profesional cu placa, pero Nepal a baha e costo pa un expedicion, locual ta pone cu aficionado y esunnan cu kier aventura ta bay. Ta exigi pa nan tin un carta di dokter cu ta garantisa cu ta fisicamente apto.
Pa haltura, nan tin algun ora pa subi pa no risca di problema di pulmon yena cu likido. Tampoco ora hende muri, ningun tin energia pa baha e curpa. “Cada minuut ta conta. Grupo di hende sin experiencia ta pone expedicion tarda di 12 ora pa 17 ora pa subi, sea pa cansancio of falta di guia.”
Nepal no tin regla pa determina cuanto permiso por otorga, cualkier persona cu un carta di dokter por paga $11.000 pa haya un permiso. E aña aki a duna 381 permiso, e cantidad mas grandi segun gobierno. Oficialnan di turismo Nepales no tin intencion di restringi e cantidad di permiso otorga, na luga di esey, ta curasha mas turista y alpinista pa bin ‘tanto pa placer como fama’, segun Mohan Krishna Sapkota, secretario na Ministerio di Turismo y Aviacion Civil.
“No tin control suficiente den area di permiso. Tur hende kier subi pa sinti na top di mundo. Mas hende ta bin, mas permiso, mas negoshi. Pero e riesgo mas grandi ta cu bida ta wordo perdi”, Mirza Ali a bisa, kende ta alpinista di Pakistan y tin su compania di turismo.
