Un biaha mas, Minister Presidente, Evelyn Wever-Croes a adverti nos comunidad riba rumor of informacion falso of asina yama fake news cu ta circulando rond, relaciona cu e crisis di casonan nobo di Covid cu nos ta pasando aden. Pero tambe riba e medidanan cu crisis team a cuminsa implementa pa contraresta cu mas persona por resulta contagia cu e virus aki.

E ta recomenda tur hende interesa pa bishita e website: arubacovid19.org, unda bo por haya variedad di informacion relevante riba e topico di Covid. Tambe informacion riba e maneho cu ta wordo hiba pa atende cu e coronavirus crisis, entre nan maneho nobo riba isolacion.

A pesar cu e barnan ta cera, un informacion cu ta circulando rond ta cu gobierno a decreta ley seco. Diabierna anochi e prome mandatario a bisa cu e informacion aki ta falso.

Actualmente no ta tempo pa celebra, ya cu el a subraya cu e situacion cu nos ta aden ta uno serio. Un situacion cu ta demanda atencion y cooperacion di cada un di nos pa logra mitiga e cantidad di caso positivo. Sinembargo el a desmenti e rumor of noticia falso di ley seca, tambe el a desmenti e rumor di toque de queda. Pero e no ta descarta tampoco cu esaki no lo sosode despues. “Nos ta evaluando nan,” el a bisa. Den seno di crisis team nan ta evaluando con e virus ta desaroya hunto cu e crisis cu e ta produci den nos pais. Si mester, nan lo bin cu mas medida, entre otro ley seca y/of toque de queda, pero te ainda esey no ta e caso.

Aunke nan ta atendiendo cu e crisis manera cu ta, pero mester di e compromiso y responsabilidad ciudadano di cada un di nos. Un medida cu a wordo tuma siman pasa ta un no por habri scol te dia 3 di september awor. E cambio aki tabata pa preveni cu mas hende ta riba caya. E ta un fecha tentativo cu nan lo sigui evalua si e condicion ta presta su mes pa habri of no nos sistema escolar.

Keho y critica

 

Encuanto e keho y critica cu tin, entre otro cu persona ta yama y no ta haya contesta mesora, y tin hende cu ta warda dianan pa cita pa haci test, premier Wever-Croes a pidi pasenshi.

El a laga sa cu a pesar cu nan tabata prepara pa esaki, y nan a prepara bon, pero e mandatario a admiti cu e cantidad di casonan cu nan mester atende cune ta uno grandi, y nan mester atencion pa esaki tambe.

El a sigura cu e situacion den hospital ta bao control, aunke nan ta atendiendo cu cantidad di pashent interna pa Covid. Nan ta ubica den un piso special, exclusivamente pa nan, y e atencion ta uno cuidadoso y extra special pa nan. Encuanto un noticia cu ta circula rond cu e piso aki ta infecta, e ta haya cu no tin hustificacion pa bin cu e tipo di noticia aki pa crea panico. Ya cu e ta e piso den hospital cu nan tin destina exclusivamente pa e pashentnan di Covid. El a sigura: “Akinan ta hende serio ta trahando.”

Tambe encuanto maneho di isolacion cu a cambia y cu a genera hopi reaccion, el a indica cu e tipo di cambio aki a bini, ya cu naturalmente e comportacion di e virus ta cambia. Nan mester adapta na e cambionan cu e crisis aki ta trece cune y cu internacionalmente ta wordo haci. Nan ta cambio cu como pais, Aruba mester adopta pa nos por adresa e situacion, ya cu e biaha pasa nos tabatin 100 caso, pero awor el a surpasa mil caso. Esaki ta trece cune adaptacion pa atende e situacion nobo.