E siman aki a resulta un siman productivo pa Staten. Den tres dia a trata y aproba tres ley o cambio di ley, loke a duna un bon impresion di un parlamento diligente, despues di cu hopi di nos tabata puntra nan mes ta pakico tin un parlamento si nos no ta mira actividad. Pues awor en todo caso nos por a haya un vista di un parlamento dunando un impresion con nan por traha. Nos ta bisa esey tambe pasobra e ambiente y comportamento di e mayoria di e representantenan tabata na nivel halto di respet mutuo. Talvez e temanan a contribui na esaki tambe, no asina controversial, pero ta di spera cu ora e debate bira mas cayente lo corda cu diferencia di opinion y respet mutuo ta dos aspecto diferente cu mester biba banda di otro.

Durante e promer tratamento dialuna pasa mester bisa cu e tratamento por a dura varios ora menos, si e presentador di e ley – actual presidente di Staten – no a perde tanto tempo convenciendo e audiencia cu e ta un educador, cu e ta un academico y cu su coleganan mester tin suerte pa tin un genio asina na cabez di e organo. Nos ta comprende cu cierto satisfaccion na su banda ta natural, cu porfin e ley a bolbe cu e perspectiva cu awor si tin un mayoria pa pasa esaki. Pero e no mester a hiba na e show personal iritante cu el a para bira. Humildad ta algo bon pa nos tur.

Ademas e contenido di e ley, a pesar cu tabata di siete oportunidad cu el a yega Raad van Advies (RvA) y parlamento, no a keda satisfactorio ya cu ainda tabatin omision aden. Principalmente e parti unda no a sigui conseho di RvA pa pone e ley aki di biaha pa tur persona den posicion electo politico, es decir incluyendo e propio parlamentarionan mes. Nos tin e leve sospecha cu si mester a inclui e parlamentarionan mes, nunca e parlamentario presidente lo a logra haya un mayoria pa vota na fabor di e ley aki. Pues a tuma un victoria parcial di un ley pa ministro so, cu e promesa – vago – cu dentro di 6 luna lo tin un follow up ley pa cubri e screening di parlamentario. Nos no ta mira ningun realismo den e promesa aki, pero ban ta optimista.

En todo caso e ley aki a keda limita den su alcance, pasobra e no a toca e tema di acumulacion di famia den e despacho di un ministro. Den su defensa di contratacion di famia den despacho ministerial e presentador di e ley hasta a bay asina leu di bisa cu su persona cu orguyo lo emplea su yiu na su despacho si e yega na e puesto ey. Nos no ta bay na condena e apreciable representante di pueblo pa su posicion, pero ta indica si cu su expresion ta ehemplo di e tempo den cual nos ta biba. Algun decada atras como ambtenaar bo no por a ni bay traha na un departamento unda bo tabatin ruman ta traha caba. Ta e propio politiconan cu a kibra e regla di oro aki – no formaliza den ley – y esey ta hiba nos na e situacion serio di nepotismo, cu no ta haya ningun obstaculo den e actual ley di screening. Por ta cu ta pesey a logra pasa e ley debil aki?

E otro dos leynan cu a pasa parlamento den ultimo dianan tin otro defecto cu nan, cu ta cay mas tanto den e categoria di ‘problema di implementacion’. Ta masha facil pa decreta via ley cu ningun establecimento por bende tabaco cu persona bao di 21 aña di edad, pero ken ta bay controla? Ehemplo: dos amigo ta drenta un tienda, e hoben di 18 aña ta cumpra e bebida alcoholico y e otro, di 21 aña, ta paga pa e cigaria of otro producto di tabaco. Efecto netto: nan ta bay sinta huma y bebe hunto tranquilamente, y e doño di tienda tampoco a viola ley… Pa colmo, den e contestacion cu nos a scucha e autoridadnan legislativo duna, no por a duna ningun impresion con e control y efecto realistico riba comportamento di persona lo ta, pasobra no a haci investigacion… Tur cos ta keda pa casualidad di bida defini den futuro, pasobra claro, mester tene cuenta cu nos ta den un crisis y gobierno no tin placa… esaki ta en berdad nos nivel di gobernacion actualmente.

Di igual manera a trata ayera e ley cu ta trece algo di cambio den e Ordenanza di Prijs cu ta brinda, riba papel, un poco mas proteccion pa e consumidor. Aki atrobe e mesun pregunta: ken ta bay controla y kico nan por haci – pa ley. Atrobe nos ta haya henter e lista di debilidad administrativo gubernamental unda nan mes ta parce di ta e estorbo mas importante pa control efectivo. “Anto kico, esey pa mas di 20 aña ta asina caba, kico boso kier” tabata e comentario cu nos a hay di un observador. E tin razon di un banda, nada no a drecha den dos decada, pero pakico ta sigui traha mas ley si nos no por garantiza control? E contesta ta cu asina nos legisladornan ta sigui aparenta traha, y nos ta para na banda ta aplaudi. Tur hende contento?