E interes di operadonan Asiatico pa registra nan avionnan na Aruba ta creciendo. Probablemente na juni/juli Aruba lo certifica (AOC) e prome operador for di e continente Asia.
Esaki e fuente Business Jet Traveler ta informa a base di un entrevista cu Alexandria Colindres, e hefe encarga na Aruba cu e desaroyo di registracion di avionnan. Desde 1995 Aruba tin mas cu 150 avionnan comercial y priva bou su registracion. Segun sra. Colindres nan a mira den e ultimo aña y mey un crecemento di e mercado Asiatico.
Segun e nos tin suficiente inspector adecua pa controla e avionnan cu e operadonan kier registra na Aruba. Sra. Colindres ta bisa cu nan ta tene nan mes na e regulacionnan y standard nan internacional. Sinembargo tambe lo tin e capacidad duna servicio special si e clientenan ta pidi esaki.
