Tur siman nos lo publica e resultadonan di e poll riba un ponencia. E poll aki por haya riba nos website BonDia24.com. Biaha pasa e poll a haya un bon acogida. E biaha aki nos a ricibi hopi comentario y hasta votonan riba nos Facebook page. Sinembargo nos kier pidi pa esunnan interesa pa uza e poll riba nos website pa vota. Por haya e link riba nos Facebook page unda nos ta publica e videonan tambe di tur partido su motivacionnan tras di nan contesta di si of no riba cada ponencia.
Un pregunta grandi pa nos, cu bista pa futuro, ta si nos ta sigui aumenta e cantidad di hotel y camber na Aruba. A corto plaso nan ta trece trabao, pero ta necesario pa mira ki tipo di trabao. Un hotel tipicamente tin tiki trabao di nivel superior, y poco tambe na nivel intermedio. Gran parti di e empleo ta na nivel basico y gran parti di e trahadonan ta bin di exterior. Pago pa e trabao aki tambe ta modesto, y ta haci cu e pago mensual na prima (AZV, AOV) ta minimal.
En cambio, desde cu e trahado yega Aruba, e ta gosa di tur privilegio di AZV, pa cual e ta contribui un par di cien florin pa aña, mientras cu e gasto promedio di un persona sigura na AZV ta na nivel di miles di florin. Cu cada camber di hotel acerca, nos ta emplea un promedio di 2.2 persona, mayoria di exterior. Den esaki ainda nos no a toca e tema di e reunificacion di famia, unda casa y yiu tambe ta bin Aruba, cu consecuencia pa vivienda, scol y infrastructura. Hunto cu e gastonan di nos seguro medico y social nos por ta ganando a corto plaso cu crea mas hotel, pero a lo largo e gastonan extra cu ta bin acerca pa nos mes, no pa e empresario cu ta explota hotel, ta haci e caminda di habri mas hotel den un ruta indesea.
Institucionnan di supervision financiero, manera Fondo Monetario Internacional (IMF) y e agencianan di ‘credit rating’ manera Fitch y Standard & Poor’s tin varios aña ta adverti pa hiba economia di Aruba den otro direccion cu no ta sigui aumenta cantidad di camber. Nan ta di acuerdo cu loke Aruba mester ta mas actividad economico cu ta paga salario halto o por lo menos mediano, pa yuda haci entre otro nos seguro medico y social mas balansa. Ademas esaki ta bon pa caha di gobierno tambe, cu ta haya relativamente mas impuesto di salario halto na luga di sigui aumenta e base grandi di salario chikito cu apenas por contribui. Tambe mester puntra nos mes si Aruba no ta yegando na e maximo di loke nos por maneha, mirando e presion riba recursonan natural, manera beach, naturalesa, etc. cu e presencia di mas di un miyon turista ‘stayover’. Unda nos kier yega
