Alrededor di 500 persona ta registra pa vota otro siman den eleccion di Hulanda Esaki ta un cifra mas halto cu e ultimo eleccion.
Otro siman diaranson, 15 di maart, tin eleccion na Hulanda. Ciudadanonan nacionalidad Hulandes bibando na Aruba tabata tin e oportunidad pa registra pa vota den eleccion di Tweede Kamer te cu 1 di februari 2017.
Jeroen Boudestijn, vocero di VNO (Vertegenwoordiging van Nederland) ta informa Bon Dia Aruba riba e cantidad di registracion y conclui cu tin mas hende registra cu biaha pasa. Den comparacion cu eleccion di Tweede Kamer den 2012 unda tabata tin 315 registracion. Desde diamars e hendenan cu a registra por bin busca nan papelnan pa vota. “Nos a caba di haya e prome ‘Oranje retour enveloppen’ cual ta keda cera y nos tin esaki warda anto bon sigura,” sr. Boudestijn ta bisa. Tur e registracionnan nan ta manda na Den Haag caminda pa eynan nan ta controla. Hendenan tin e opcion pa manda nan formulario di registracion na Den Haag directamente of haci esaki via VNO.
Rekisitonan
Na Den Haag ta controla si e personanan registra pa vota ta cualifica pa esaki y cumpli cu tur rekisitonan. Por ehempel si bo ta biba na Aruba awo, bo mester por a biba minimo 10 aña na Hulanda pa bo por cualifica pa vota como tambe cumpli cu algun otro rekisitonan legal. Sr. Boudestijn: “Tur esey ta tras di lomba. Hopi hende a bay busca nan papelnan pa vota otronan ta haya nan na nan cas via koerier. Nos tin algun ainda akinan sperando pa hende bin busca nan.”
