Director di Fundacion Anti Droga Aruba (FADA) Rhomyko Winklaar y su delegacion a reuni recientemente cu formadornan di gobierno, Gerlien Croes y Mike Eman. Manera varios otro instancia y stakeholder den comunidad, FADA a trece dilanti nan puntonan di prioridad y preocupacionnan relacion cu e trabou cu e fundacion ta eherce.

Den su declaracionnan na prensa Winklaar a splica cu durante e reunion cu e formadornan nan a trece dilanti nan preocupacionnan y tambe nan vision pa locual ta trata e aña cu a caba di drenta y añanan siguiente. El a remarca cu nan a para keto na e parti di prevencion, cu ta un parti esencial den e trabou di e fundacion. “Semper nos a bisa preveni ta miho cu lamenta y eynan ta unda nos a pone enfasis riba dje,” el a indica.

Pa loke ta aumento di cantidad di uso di droga of trendnan nobo cu tin entre e hobennan, of ciudadanonan en general, Winklaar a indica cu e trend nobo cu ta conoci internacionalmente ta vaping.

El a remarca cu esaki ta algo cu tin atencion di e fundacion. El a splica cu hopi biaha nan ta wak hopi biaha cu e tendencia aki ta bin dilanti no solamente entre hobennan, pero nan ta mira c menornan di edad, muchanan hopi mas hoben ta usando esaki pasobra e ta un tendencia.

Winklaar a menciona cu social media tin un influencia masha grandi den locual ta adultonan mes, pero sobretodo e tin un influencia grandi den muchanan. Aki, el a remarca, ta unda cu e muchanan hopi biaha ta tuma tendencia aki over sin pensa ki consecuencianan esaki por tin pa nan aworaki den presente y pa despues den futuro.

Pa loke ta e puntonan di preocupacion, el a splica cu nan a trece dilanti cu nan lo desea naturalmente pa tin hopi mas prevencion ta tuma luga. El a señala cu nan tin mester di personal ekipa pa por haci e funcionnan aki y relaciona cu esaki e fundacion kier trece mas training pa nan personal ta miho prepara.

“Tin hopi scolnan na Aruba y nos deseo ta pa por yaga na tur scol y tur mucha cu nos por yega na dje ta uno menos cu lo por termina den futuro riba caya cu un adiccion of cu un problema psikiatrico of problema mental,” el a remarca.

Problema di falta di persona ta algo cu e fundacion tambe ta enfrenta. Winklaar a splica cu como fundacion nan ta desea haya mas persona, pero ta importante pa nan ta ekipa pa nan por yega na tur caminda.

El a indica cu e fundacion ta draai diferente proyecto, pero ta proyectonan di duracion cortico y nan ta desea pa esakinan tin un duracion mas largo. “Lo ta ideal si nos por tin dos of tres persona extra pa haci tur e trabounan ki. Por ta e no ta zona hopi pero mirando e cantidad di peticion cu ta drenta pa nos por acapara tur loke nos tin. Pasobra actualmente den weekend y parti anochi nos ta duna servicio y pa alivia nos personal pa tur hende por haya e calidad di servicio cu nos ta desea di brinda,” el a agrega.

Pa loke ta e situacion financiero y si e fundacion tin necesidad di mas fondo, Winklaar a indica cu ta ideal si nan lo tin mas fondo mirando cu gastonan ta keda subi tur aña. “Nos ta pleita pa yega na fondonan extra. Nos ta haya hopi biaha fondo di sector priva, vooral ora ta trata proyectonan, mirando cu tin e parti di responsabilidad di organisacionnan, Corporate Social Responsability, caminda hopi biaha organisacionnan ta duna di nan parti tambe pa ora cu tin proyectonan special, e ora bo ta haya bo cu tin proyecto cu ta tuma luga cu fondonan externo,” el a splica.

Por ultimo, Winklaar a indica cu e deseo di fundacion ta cu nan por haya e fondonan necesario, y esaki el a menciona ta trata di alrededor 900 mil florin den su totalidad, pa por draai cu e personal. Ademas di esaki, el a agrega nan mester di material tambe pa parti flyer na scolnan y pa e parti di prevencion tambe tin costo. “Si no tin fondo pa e producto yega e no ta yega na unda cu e tin cu yega. Eynan lo ta ideal cu nos tin e fondonan aki pa nos por haci esaki realidad,” el a finalisa.

Potret: Facebook FADA