(NLTimes) – Banconan di cuminda, banconan di paña y otro organisacionnan yudando famia y hendenan soltero cu ta luchando tur luna a ripara cu tin un aumento hopi cla den nan cantidad di cliente durante ultimo lunanan.
Un encuesta di Stichting Armoedefonds (Fundacion Fondo di Pobresa) entre centenares di organisacionnan di ayudo a haya cu dos tercera parti a mira un aumento den e cantidad di solicitud pa ayudo, segun NOS ta reporta.
“Tin un grupo cu ta bibando den pobresa structural pa hopi tempo, y awo ta agrega hende cu no por logra cubri nan gastonan mas pa motibo di e aumentonan di prijs”, segun Irene Verspeek di Armoedefonds a bisa NOS. “Esakinan ta, por ehemplo, mayornan soltero cu mucha. Anteriormente nan tabata por cumpra tur loke nan mester, pero awo esaki no ta posible mas.”
Cinco porciento di organisacionnan di ayudo hasta tin un lista di espera pa esnan cu ta buscando ayudo. En averahe, hende mester a warda casi 50 dia prome cu yega nan turno. Stichting Armoedefonds ta spera cu e listanan di espera ta bay aumenta. “Ta bay tin mas pobresa ainda”, Verspeek a bisa. “Hopi hende ainda no a tuma e stap pa busca ayudo. Hopi biaha hende ta lucha pa alrededor di cuatro aña prome cu ta yama pa pidi ayudo.”
Potret di NOS.
