Prome Minister, Evelyn Wever-Croes, minister di Financia, Xiomara Ruiz-Maduro y minister Plenipotenciario, Guillfred Besaril a reuni awe mainta cu secretario di Reino Hulandes, Raymond Knops na Bestuurskantoor.
Enfasis di e bishita di secretario Knops primeramente ta pa cera conoci cu gobierno nobo di Aruba. Pero tambe pa ta a tanto di e situacion financiero di nos pais, asina gobierno ta informa den un relato. Prome Minister Wever-Croes a duna di conoce cu e reunion aki tabata di suma importancia pa nos pais na unda a informa secretario Knops riba e situacion financiero real di nos pais. Tambe gobierno a informa con leu ta cu e plannan pa trece Aruba bek riba e trayectorio con pa yega na un presupuesto sostenibel y saludabel. Un presupuesto sin deficit sino cu surplus.
Hulanda a concede Aruba mas espacio pa prepara e plan pa yega na presupuesto balansa pasobra gobierno kier cumpli cu palabracion nan haci y bay na un Aruba cu un situacion financiero sano sin deficit teniendo espacio tambe pa haci inversionnan. Aruba a sinti e resulta pa via cu inversion den cuido social ta wordo neglisha cu e morto di dos criatura, y esaki gobierno no kier pa bolbe pasa. “Nos a mira inversionnan di e gobierno anterior cu a inverti den caretera mas tanto. Pero awo ta falta di inversionnan den e ser humano, den enseñansa, den salubridad entre otro. Esaki ta un tema tambe cu a capta atencion di secretario di Reino na unda cu Gobierno a mustra cu ta trahando riba un plan di crisis social.”
Gobierno a informa sr. Knops tambe con a enkontra gobernacion. “E forma con no tabata tin un traspaso na unda cu ‘basicamente a wordo sabotia pa cuminsa traha y con tur dia ainda gobierno ta hayando sorpresa nan di decision nan inadecua cu gobierno anterior a tuma.” Riba esaki, prome minister a informa sr. Knops cu gobierno lo percura pa den futuro esaki no pasa mas den un traspaso di gobierno, na unda lo introduci reglanan y protocolnan pa asina e traspaso bay den un forma ordena. E crisis di e situacion di Venezuela tambe tabata un tema cu a haya atencion den reunion cu secretario Knops cu a conduci na e tema di preocupacion cu tambe a wordo trata ta si den e caso cu bin un crisis na Venezuela y hopi hende sali y kier yega Aruba, lo bira algo cu Aruba so lo no por carga na unda Reino lo mester saca un man pa yuda. Y si no atende cu e tema aki apropiadamente, e lo refleha malo pa henter Reino.
Prome minister a informa tambe cu Aruba kier mantene un bon relacion den Reino a base di madurez y respet mutuo na unda cu nos mes lo atende cu nos asunto y problemanan y percura pa nos tin solucionnan structural y unda cu di berdad tin mester, nos lo acudi na Hulanda pa ayudo.
Prome minister a enfatisa cerca sr. Knops cu Gobierno aki ta un gobierno nobo cu vision nobo y lo kier concentra riba dos pilar importante. “Nos kier un financia publico saludabel y na ordo. Nos kier bon gobernacion, di ordo y respet pa asina nos pone e ser humano central.”
