Mas docter y specialista… Ta combati sintoma so…

Na inicio di aña semper nos ta haya e bon intencionnan di gobierno. Asina mester ta tambe, aunke esey ta lo minimo. No por keda na esey so, durante aña nos lo sigui e desaroyonan riba diferente tereno y raporta esaki. Esey no ta nada mas cu haci nos trabao como prensa. Pero banda di sigui e acontecimentonan segun aña ta avanza, tin otro responsabilidad y esey ta pa pone e bon intencionnan den un cuadro mas amplio, pa por averigua si mas a largo plazo e pasonan anuncia en berdad ta bay hiba nos unda nos mester bay. Nos ta kere cu aki ta falta bastante analisis adicional den medionan di comunicacion, cu mayoritariamente ta limita nan mes na sigui e sucesonan manera nan ta presenta. Nos ta haci un intento pa yena e necesidad aki. Nos ta tuma como ehemplo e anuncio di nos mandatario encarga cu entre otro Salud Publico, unda ta bay tin mas recurso disponible pa docter di cas y specialista. E aumento di e cantidad di docter di cas ta sigura caba, mientras pa specialista tin cu logra e reclutamento ainda. Ban spera cu esey logra.

Awor pa e panorama mas amplio riba e asunto aki. Ta mas cu obvio cu, segun cierto norma cu ta maneha pa cada puesto di docter o cada specialista den determinado specializacion, tin un necesidad creciente. Despues di un caida den e poblacion registra oficialmente na 2020, recuperacion economico ta trece cune cu poblacion ta aumentando atrobe. Pues e decision ta mustra acerta, pero ta limita na combati e sintoma so y no e problema structural. Banda di e crecimento poblacional nos tin tambe un situacion di salud general cu ta bayendo atras. Esaki di un banda ta pa via di un parti creciente di poblacion di edad halto, y edad ta trece relativamente mas problema medico. Pero tin algo mas. Esey ta cu ta presenta mas caso di enfermedad cronico, loke ta un tendencia di varios aña caba, pero unda ta dificil pa averigua con e situacion ta birando mas serio, y den ki specialidad. No ta asina facil pa haya e datonan cu por duna un vista obhetivo den esaki. En todo caso e relato anual 2021 di AZV ta indica cu e aña ey tabatin 703 pacient cu a bay exterior pa tratamento, mientras cu e aña anterior esey tabata 556 persona; un aumento di 26,4%. En total e gastonan na 2021 tabata Afl. 34,5 miyon, mientras na 2020 esey tabata Afl. 27.3 miyon. Mester desconta den esaki cu e aña anterior (2020) por tabatin menos pacient a bay exterior, relaciona cu e crisis di Covid-19. Esaki por a causa cu na 2021 tabatin un aumento a base di e efecto di compensacion den e siguiente aña. Di otro banda, tin un grupo di pacient no ta biahando mas pa exterior pasobra nan por haya tratamento na Imsan, loke tin un efecto positivo riba e gastonan di biahe. A proposito, e pacientnan di Covid cu a bay exterior no ta conta den e cifranan aki. En general nos ta kere cu e cantidad di pacient cu problema cronico di salud ta sigui crece. E mero hecho cu ta necesario pa aumenta cantidad di specialista ta indica esey tambe. Otro aspecto importante pa tene na cuenta ta e hecho cu e intentonan pa austeriza, pa via di e acuerdonan cu Hulanda, ta haci cu tin un politica di posterga cierto gastonan te despues; den nan propio palabranan esey yama ‘temporiseren’ di e gastonan. No cu nos ta kere cu esey ta yuda pasobra tardi o tempran nan ta bolbe riba mesa toch, pero e ta permiti a corto plazo cumpli cu e acuerdo haci di baha gasto.

Pero awor e futuro nos dilanti. E pregunta cardinal ta kico por haci structuralmente pa contene gasto medico. Di mes caba nos mester tene na cuenta cu e poblacion di edad halto ta bira un parti mas grandi di e poblacion, y ta urgente pa ataca e problema di e otro banda, esta di promove activamente un otro estilo di bida, uno mas saludable, a base di mihor nutricion y ehercicio fisico, y no keda pega den combati sintoma. Lamentablemente nos ta tende demasiado poco di kico por haci den forma mas activo. Nos ta perdiendo tempo costoso cu keda trata e tipo di medida aki como algo ‘den banda cu no mag costa hopi’. Ta mira esaki ainda como e ‘pot di voorlichting’ cu semper mester ta un fraccion di e gastonan total. Esey lo ta un eror grave, pasobra mester mira esaki mas bien como un inversion den nos poblacion di mañan. Aumenta e cantidad di docter di cas y di specialista ta mustra completamente logico for di e perspectiva limita di atende e necesidad directo, ta haci en berdad cu e lista di espera di specialista ta bira mas cortico, loke ta necesario, pero no ta contesta e pregunta cu ta riba e caminda aki nos ta keda core.

Den e proximo decadanan nos ta topa cada vez cu dos problema grandi, cu consecuencia financiero grandi: pension di behez y gasto medico. Nos ta observa cu pena cu den e ambiente politico local no tin debate tocante e asuntonan strategico aki, sino cu nos parlamento ta parce pobla cu hende, salvo algun excepcion, cu no tin ni un nocion di con nos mester bay anda cu e cosnan aki. Ban sigui combati sintoma, y no e enfermedad.