Mas di mil studiante y miembro di staf na dos universidad di Los Angeles a wordo poni bou cuarentena riba campus of manda cas e siman aki, den un di e esfuersonan mas amplio te awo di autoridadnan di salud publico pa contene e plamamento di sarampi na Merca, unda casonan a alcansa e cantidad mas halto den 25 aña.
Pa diabierna anochi, dos dia despues cu condado di Los Angeles a ordena e precaucionnan, como 325 di esunnan afecta por a bay bek despues di a demostra nan inmunidad contra e malesa, sea mediante record medico of test, oficialnan di salud a bisa.
E accion na University of California y California State University – cual den conhunto ta conta cu mas di 65,000 studiante – ta refleha e seriedad cu cual oficialnan di salud ta tumando e brota nacional.
“Sarampi ta mata hende, pues nos mester tuma esaki hopi na serio”, Dr. Armand Dorian, hefe oficial medico na USC Verdugo Hills Hospital, a bisa.
Esunnan bou cuarentena a ricibi instruccion pa keda na cas y evita contacto cu otronan. Ademas nan a ser prohibi pa biaha den transporte publico, incluyendo avion, trein, bus of taxi. Si nan mester biaha pa un emergencia, nan mester notifica oficialnan di salud publico prome.
Dr. Barbara Ferrer, director di salud publico di e condado, a bisa: “Esaki ta un orden legalmente obligatorio.” El a agrega cu esun cu no cumpli lo enfrenta accion legal, pero cu ta parce cu tur hende ta cooperando te awo. E no a describi ki accion lo tuma contra esunnan cu no coopera.
E cantidad di caso di sarampi na Merca a yega casi 700 e aña aki, incluyendo cinco na condado di Los Angeles y 38 den total na California. E brota ta culpa mas tanto riba mayornan cu no a hiba nan yiu vacuna pa motibo di mal informacion tocante e supuesto riesgonan di vacuna.
California State a reporta cu 875 studiante, miembro di staf y facultad, y bishitantenan, a ser poni bou cuarentena despues di posibel contacto cu sarampi e luna aki. Como 250 a demostra nan inmunidad y a bandona e cuarentena.
Na UCLA, 129 studiante y facultad a ser poni bou cuarentena. Tur menos 46 a ser laga liber diabierna.
Mirando e duracion cu un persona ta keda contagioso, oficialnan a bisa cu e cuarentena lo caba diamars na UCLA y diahuebs na California State.
Den e pais, legisladonan na California, New York, Washington state y Oregon a responde na e brota door di evalua eliminacion di exencion pa vacunacion di mucha. Diabierna, presidente Donald Trump a urgi tur hende pa ricibi vacuna.
Mayoria di caso ta centra den dos comunidad hudiu ultra- ortodox na New York – un na Brooklyn, e otro den suburbio Rockland County.
Na Rockland County, oficialnan a declara estado di emergencia y na dado momento a purba di prohibi muchanan sin vacuna for di scol y sitionan publico, pero un hues a nenga e accion.
Autoridadnan a ordena vacuna obligatorio e luna aki den e bisindarionan afecta na Brooklyn y a menasa cu boet di $1000.
E Centro pa Control y Prevencion di Malesa (CDC) ta recomenda e vacuna pa tur hende mayor di un aña di edad, excepto esunnan cu a haya e malesa di chikito. Esunnan cu a haya sarampi caba ta immuun.
Oficialnan di salud den un conferencia di prensa a urgi hende cu no a ser exponi na sarampi pa ricibi e vacuna, bisando e ta sigur y efectivo.
