E organisacion Foro Penal na Venezuela a confirma cu nan a registra desde 4 di april 2017 te dia 22 di e luna aki, 1.365 aresto den e protestanan den henter pais contra gobierno di Nicolás Maduro.
E director di e organisacion no gubernamental (ONG), Gonzalo Himiob, a traves di Twitter a detaya e total di detenido y a indica cu di e cantidad aki, 451 persona a haya nan libertad sin presentacion dilanti fiscal, 97 bao medida cautelar, 305 detenido na espera di fiado pa bin paga fianza, 54 priva di libertad pa decision hudicial, 40 den libertad pleno y 418 detenido na espera di presentacion dilanti autoridad hudicial.
Himiob a señala cu e informacion oficial a yega te cuat’or di atardi di diasabra ultimo, y por lo tanto no ta inclui detencion cu a tuma luga posteriormente.
Marchanan ta continua
Mientras tanto e lidernan opositor a declara cu e manifestacionnan publico contra regimen di president Maduro ta continua. Pa diamars dia 24 e agrupacion opositor MUD a anuncia otro marcha grandi den henter e pais, bao di e nomber “Gran Plantón”, despues di e exitoso marcha den silencio diasabra pasa na Caracas, unda pa prome biaha autoridadnan a permiti e marcha yega na e luga final, cu den e caso aki tabata e sede di Conferencia Episcopal. E marcha silencioso tabata pa conmemora esnan cu a perde nan bida den e confrontacionnan cu autoridad durante e marchanan den e luna aki.
