E organisacion Observatorio Cubano de Derechos Humanos (OCDH) a denuncia ayera cu tabatin 4.665 detencion arbitrario na Cuba desde januari 2017, di cual 306 ta na luna di november. Den mayoria di caso (211) ta trata di hende muhe.
“Gobierno Cubano ta persisti den su dinamica represivo,” e organisacion opositor contra gobierno di Raúl Castro ta señala den un nota di prensa difundi ayera na Spaña.
Nan ta denuncia entre otro e actuacion di autoridad Cubano, e detencionnan arbitrario di corto y largo duracion, e confiscacion o robo di bienes personal o di medionan di trabao, e impedimento di salida di e pais di activistanan invita pa foronan internacional y e retencion y agresion contra activista den nan propio vivienda.
E opositornan Cubano ta señala e amplio alcance di e strategia represivo di gobierno di e isla, “cu ta yega na investiga tur aspecto di e incipiente sociedad civil Cubano,” especialmente entre comunicador, artista y lider hubenil.
E organisacion ta señala cu e violacion di derechonan fundamental ta continua na Cuba y ta gana tereno na Venezuela “gracias na e apatia y ausencia di compromiso di no poco democrata y institucion,” den cual nan ta inclui e Conseho di Derecho Humano di Nacionnan Uni.
E organismo aki di ONU a manda e aña aki dos observador riba invitacion di autoridadnan di e isla, loke ta marca un etapa nobo den e relacion entre Nacionnan Uni y Cuba, cu no a ricibi den ultimo dies aña ningun experto independiente di e Conseho di Derecho Humano di e organisacion.
OCDH a nace na Madrid na 2009 y ta integra fundamentalmente pa activista di derecho humano na Cuba y den exilio.
