Manera tabata conoci, algun maestro y trahadornan di Enseñansa a cuminsa nan labor na scol dos ora laat, despues cu nan a asisti na e reunion cu Sindicato di Maestronan di Aruba a convoca pa asina trece dilanti nan preocupacion y inkietudnan cu e veld di Enseñansa tin na e momentonan aki.
Josephine Albertus, presidente di SIMAR, den un entrevista cu Bon Dia Aruba a comenta cu nan ta contento cu mas di 600 trahado den area di Enseñansa a pone nan confiansa den sindicato y a asisti ayera na sede di SIMAR, na Sero Blanco, na unda el a gradici tambe e mayornan cu a sostene esaki pa asina trahadonan por ta presente.
“Nos acaba e reunion prome cu 10or pa asina e docentenan por a yega back na scol prome cu muchanan yega scol y esey tabata un bon cooperacion”, Albertus a señala.
Den reunion aki el a indica cu nan a trece dilanti dos punto. Uno ta relaciona cu e recorte den Enseñansa y di dos tabata e recorte di salario di esnan laborando den e veld di Enseñansa. Den e parti aki el a sigura cu loke a sobresali ta cu nan no kier tende mas di recorte. “Nos kier tende i inversion den Enseñansa. Y nos por bisa riba e parti di 12.6%, nos por a compronde cu e docentenan a bisa cu si FASE a stop y Loonsubsidie a stop y tur cos a bay back na normal, e ora e salario di esunnan laborando den veld di Enseñansa tambe mester bay back na normal”, Albertus a destaca.
Den caso aki, el a menciona cu nan tin 20 luna cu nan tabata solidario, y aworaki si FASE y Loonsubsidie a stop, esey kiermen cu situacion na Aruba ta mehorando. E trahadonan tambe a subraya cu den e tempo aki cu nan a bin entregando, nan no ta hayando transparencia tampoco. “Nos a tuma nota di loke minister di Husticia y Asuntonan Social, Rocco Tjon a bisa, loke SVb a bisa, cu e cantidad di persona cu a haya FASE for di inicio tur luna a baha y cu aworaki tabata na 2.700 persona. Pero si a nos ta keda entrega tur luna cu e mesun 12.6%, unda e fondo a bay?” Albertus a bisa.
E situacion aki pa nan ta frustrante tambe pa motibo cu – segun el a menciona – gobierno ta haci como si fuera cu mester sigui entrega y cu no tin cu pone e situacion mas dificil. “Pero bo ta bezig cu placa di hende, nan tambe ta sacrifica y nos tur sa tambe cu esnan laborando den veld tabata duna hopi caba di nan mesun cartera. Y awor e ta bira dificil y toch nan ta zorg pa keda den enseñansa di calidad. Y aworaki nan tin cu sigui duna sin por haya un claridad riba e situacion”, el a bisa.
Igualmente, el a trece dilanti tambe cu e lucha cu nan tin no tin relacion cu politica; esaki tin di haci cu statuut, e derecho di un sindicato ta pa para pa su veld, pa e miembronan y pa e comunidad henter.
Accionnan pa 24 y 25 di november
El a anuncia cu pa mañan 24 di november, e 12 sindicato y OPPA – cu ta organisacion cu a uni na esaki – ta bay tin un reunion na Compleho Deportivo Frans Figaroa. Pa esaki nan ta haci un yamado pa tur persona interesa por ta presente for di 5or di atardi te cu 7or di anochi.
Pa diahuebs 25 di november nan ta bay subi caya pa asina entrega un manifiesto, na unda ayera esunnan cu tabata presente den e reunion a duna tur nan apoyo pa e actividad aki. “Nos ta invita henter e pueblo pa ta presente diahuebs awor 3or na Juliana School na Playa, pa conhuntamente nos cana bay te Bestuurskantoor pa asina nos entrega nos manifiesto. Pasobra nan a bisa cu gobierno a perde credibilidad y gobierno a cambia historia tanto biaha cu e ta bira dificil, y te ainda e no tin transparencia. Nos no ta bay warda mas. A bira tempo pa gobierno cuminsa traha y drecha nan beleid manera mester ta y entrega tur hende nan 12.6% back; y nan kier pa december awor”, Albertus a indica.
Di otro banda, minister di Enseñansa, Endy Croes a presenta na SIMAR ayera. Y aunke Albertus y e minister no a logra papia hunto despues di reunion, Croes a declara na varios medio di comunicacion presente cu el a tuma nota di e reunion cu a cuminsa di 8or di mainta, pero e tabatin un otro reunion y p’esey e no a logra yega mas trempan.
Croes a expresa cu e ta compronde e preocupacionnan cu e sindicato y veld di Enseñansa tin na e momentonan aki y pa e motibo ey el a yega na e reunion pa scucha nan. Ademas el a sigura cu tin cantidad di puntonan na cual ya caba nan a duna atencion.
“Nos sa cu tin hopi mas problema pa cu e condicionnan cu e maestronan y tambe di infrastructura. Ta puntonan cu nos ta bin ta papia riba nan y nos a reuni cu Josephine di SIMAR na tres ocasion caba y tur ora e reunion a bay den bon esfera. Y nos a bin scucha e maestronan y nos ta para banda di nan tambe, den e lucha” Croes a comenta.
Asina mes, el a comenta cu e kier pa nan sigui sinta na mesa y keda combersa. Riba e punto aki tambe tin otro reunion cu otro sindicatonan y expertonan na unda nan a manda pidi locual prome minister Evelyn Wever-Croes a splica den un otro reunion, unda nan a manda pidi pa Hulanda pa aña 2022 duna 50% back y aña 2023 e total. Aki el a sigura cu den proximo dianan Hulanda tin cu duna un contesta riba esaki.
Ademas, prome minister den otro declaracion a trece dilanti cu e ta lamenta tur e discusion tocante recorte di salario di 12.6% y cu tur hende sa con e situacion na Aruba a bay. “Akinan tur hende sa con e cos a bay, ta simplemente hende cu kier haci wega cune”, el a declara.
