(NLTimes) – Mas o menos 6.3 miyon Hulandes ta kere cu rednan social ta “un menasa na nos salud mental,” AD a skirbi. Di e grupo aki, 2.2 miyon persona a bisa cu nan ta sinti menos felis specificamente a causa di nan uso di rednan social. Ademas, mas di 4 miyon persona Hulandes hopi biaha a considera stop di usa Facebook, Instagram of TikTok pero no a haci esaki.
Esaki ta evidente for di National Social Media Survey cu agencia di investigacion Newcom ta ehecuta anualmente. E problema ta tuma luga entre mayoria di Gen Z y Millennials, kendenan no solamente ta pasa mayoria di nan tempo riba rednan social pero tambe ta bisa cu nan ta menos contento ora cu nan ta usa e plataformanan. Segun AD, e cantidad di usuarionan di rednan social na Hulanda ta keda aumenta. Actualmente, alrededor di 14.3 miyon persona Hulandes ta haci uso di rednan social, compara cu 1 miyon menos 5 aña atras. E grupo di edad di 20 pa 39 aña en particular a cuminsa usa mas plataforma y ta birando cada biaha mas activo.
Investigador lider Tim Jonker a nota un “contradiccion grandi” den e figuranan. “Hendenan hoben ta sufri hopi di FOMO, cual ta e miedo di no ta inclui (fear of missing out),” e ta splica. “Nan tin miedo cu nan lo perde oportunidad di presencia of mira algo si nan no haci uso di rednan social henter dia. Y un den cada 3 di e personanan cu a participa den e encuesta a bisa cu nan ta haya mas confiansa propio pa medio di usa rednan social. Mita di e usuarionan ta experencia rednan social como un suplemento pa nan bida real.
Na mesun tempo, sinembargo, rednan social tambe ta motiva stress di eleccion y e miedo di no biba un bida di acuerdo na un imagen perfecto. “Tin demasiado evento y hobby, specialmente riba rednan social,” e ta splica. “E otro fiesta no tabata hopi mas divertido cu esun cu bo a bay? Bo a scoge e pañanan corecto pa match? Influencers a pinta un imagen cu usuarionan kier biba na tur costa. E parti scur aki ta saliendo cada biaha mas.”
Jonker ta enfatisa cu e no a investiga con pa drecha e problema aki: “Esaki ta problemanan cu gobierno mester ta mirando, nos ta solamente observa e modanan.” Mas di 7100 persona a participa den e encuesta pa e estudio, cual a provee un imagen representativo pa e poblacion Hulandes di 15 aña y mas.
