Diasabra na Renaissance Convention Center a tuma luga e Expo Labor 2017. Decenas di hende a presenta mustrando interes na no solamente e vacaturanan habri, pero tambe na e diferente tipo di charla cu a wordo duna.

Esaki ta e di dos edicion di Expo Labor cu mas di 350 vacatura di trabao registra.
E meta pues tabata pa companianan bin cu nan vacaturanan habri pa asina esnan buscando of cambia di trabao por wak esakinan bao di un solo dak y solicita pa nan. Yvonne Lee-Perez, esun encarga cu e comision cu ta organisa Expo Labor, ta conta Bon Dia cu e aña aki nan a bini cu rond di 50 booth atrobe manera aña pasa. Mas o menos 40 booth tabata companianan cu a registra cu vacatura den mercado laboral anto otro companianan cu ta duna curso/opleiding. Aruba Human Resource Association a duna un sosten special na e Expo Labor aki door di yuda esnan cu tabata tin mester prepara of revisa nan CV.

Trabao cu iniciativa di expo
Bon Dia a puntra si algun hende a logra haya trabao via Expo Labor aña pasa.
Sra. Lee-Perez ta conta nos cu aña pasa nan tabata tin bon experiencia cu esaki.
“A tende comentario cu hende a bin Expo Labor y no a haya trabao, pero aña pasa nos a haya mas cu 4.000 hende cu a bishita cu riba 400 vacatura. ” Companianan a informa despues di Expo Labor cu nan a haya entre 200/300 hende solicita cerca nan. Lee-Perez: “Pues ta tuma tempo pa nan por procesa e informacion y despues dicidi ken nan ta bay yama pa entrevista. E 4.000 hendenan no a wordo acomoda cu e 400 vacaturanan cu tabata tin. Pues di mes hopi hende ta keda sin wordo yama of informa.”

E aña aki Expo Labor a laga sa cu loke cu tin disponibel, nan ta haci maximo esfuerso pa purba yena cu esnan cu ta buscando trabao of kier haci un cambio den nan trabao. Expo Labor tabata tin un registracion pa nan sa cuanto hende ta bini aña pasa pa despues haya feedback di cada compania via un formulario di cuanto hende a haya trabao. E cifranan aki t’ey segun sra. Lee- Perez pero nos no a haya esakinan for di nan pa publicacion. “Ainda nos tin companianan cu ta participa e aña aki atrobe. Pa e motibo cu nan tabata satisfecho aña pasa cu nan por a yena tur nan vacaturanan cu e hendenan cu a bini akinan solicita.”

Programa di certificacion Refineria di Aruba
Minister di financia Angel Bermudez a haci un anuncio di un programa di certificacion diasabra na Expo Labor cu ta bay bao encargo di Refineria di Aruba (RDA). Esaki ta un certificado tambe cu ta wordo reconoci internacional. Pa Citgo Aruba, esaki tabata e prome biaha cu nan ta participa cu Expo Labor (aña pasa tabata Citgo Desk y e biaha aki ta Citgo Aruba). Mariaine Croes, gerente di asuntonan gubernamental y publico na Citgo Aruba ta splica: “Nos a bin Aruba na october 2016 y aworaki nos ta den e fase cu nos ta buscando hendenan riba e mercado local pa traha cerca nos den e refineria.” Citgo Aruba tin actualmente un total di 45 posicion habri. Tin diferente cupo habri; entre safety supervisor pa construction supervisor, mester di hende cu experiencia den budgets como tambe operadornan mes. Tin e posibilidad pa aplica online via website di citgo.
Desde diasabra cu a pasa, tur persona tin cuater siman pa aplica na Citgo Aruba.