(CNN) – Pa prome biaha na Mexico, mas di 31.000 persona den prison preventivo – kiermen cu no a ricibi un condena den nan contra – lo participa den actual proceso electoral pa eligi presidente.
E decision ta obedece un sentencia di Tribunal Electoral di Poder Hudicial di Federacion (TEPJF) di 2019 den cual a determina cu personanan den prison preventivo tin derecho di vota den virtud di e principio di presuncion di inocencia.
“Cu e propuesta aki ta contribui na promocion, respet, proteccion y garantia di derecho di vota di e personanan den prison preventivo y den consecuencia ta fortalece e ehercicio na nan derechonan humano,” e consehero Martin Faz, presidente di Comision di Capacitacion y Organisacion Electoral, a bisa.
Pa eleccion di 2024, INE ta contempla cu 31.121 persona den prison federal y estatal di e pais lo vota di manera anticipa for di dia 6 te cu 20 di mei cu diferente protocol di siguridad, segun Rosa Icela Rodriguez, titular di Secretaria di Seguridad y Proteccion Ciudadano a anuncia.
Autoridad electoral a haci pruebanan piloto pa garantisa e realisacion di e ehercicio aki na 282 centro penitenciario di e pais. Rodriguez a detaya cu e total di e detenidonan den prison preventivo (88.345) a haya notificacion y invitacion pa participa den e proceso electoral y 13% a cumpli cu e rekisito di registra den un lista nominal di prison preventivo.
Algun estadonan di e pais tin legislado di derecho di vota den prison preventivo. Den e caso di Ciudad di Mexico e detenidonan tambe lo vota pa hefatura di gobierno, diputadonan y alcaldia, na Chiapas, pa gobernador, municipio y alcaldia y na Hidalgo pa gobiernonan municipal.
Segun INE, ta bay instala mesanan receptor di voto na e centronan penitenciario y ta bay entrega envelop cu e carchi di eleccion federal y local. E verificacion di e votacion ta bay tuma luga na e mesanan aproba pa consehonan distrital. E incorporacion di resultadonan na sistemanan electoral ta bay ta den man di instituto y organismonan publico local conforma na e tipo di eleccion.
Articulo 38 di Constitucion di Mexico ta establece cu derechonan of facultadnan di e ciudadano ta keda suspendi, entre otro casonan, “pa ta suheto na un proceso criminal pa delito cu por parce penal corporal for di emision di prison formal.”
Cu e decision aki, Mexico ta uni na un lista di paisnan cu ta garantisa derecho di vota di personanan priva di libertad manera Argentina, Brasil, Canada, Chile, Colombia, Costa Rica, Merca, Ecuador, Alemania, Italia, entre otro.
Observatorio di Eleccion y Derechonan Politico den Prison ta señala cu un componente fundamental pa proceso di reinsercion social di personanan priva di libertad ta e participacion civico.
