Segun Statistical Institute of Jamaica (STATIN) hende muhe ta sobre representa den estadistica nacional considerablemente, pasobra un grupo di hende homber, calcula na 28.000 pa 2016, ta aparentemente desaparece di bida diario. E personanan aki, den edad 25 pa 54 aña, ta sali di registracion oficial principalmente a causa di morto o emigracion. E cifra aki por ta mas halto ainda si tuma na cuenta e personanan encarcela. Dato pidi na e departamento di Servicio Coreccional sin embargo no ta disponibel pa publicacion.
Di acuerdo cu sociologonan, tres factor ta responsabel pa e desbalansa entre e sexonan den cualkier pais: diferencia significativo den tasa di sexo na nacemento, disimilaridad den tasa di mortandad entre sexo, y migracion diferente segun sexo.
Sin embargo, cu hende homber cu un tasa mayor na momento di hacimento di 1.040 hende homber pa cada 1.000 persona femenino, tasa di nacemento no ta un factor cu ta splica e cifra abao di hende homber mas laat den bida.
Di acuerdo cu expertonan, e desaparicion di homber Jamaiquino den e grupo di 25 – 54 aña ta primordialmente debi na morto prematuro y emigracion.
Ruiz Warren, sociologo y lector na Montego Bay Community College, a bisa cu e definitivamente ta kere cu hende homber ta na peligro na Jamaica.
“Nos ta mira mas homber cu ta muri, cu ta den prizon, y mas hende homber ta vulnerabel pa drenta den crimen, uzo di droga, y bira victima di asesinato,” Warren a declara.
“Anto, den e sentido ey, Jamaica tin un problema serio pasobra nos ta perdiendo un segmento significativo di e poblacion den nan contribucion na e aspectonan reproductivo di comunidad,” el a agrega.
Dr Denarto Dennis, economista y lector na University of the West Indies, ta di acuerdo cu Warren. Dennis ta argumenta cu e ausencia di hende homber por tin un impacto adverso riba economia di e pais.
“Jamaica tin un economia cu intensidad laboral halto. Por lo tanto, cualkier presion riba costo di labor lo tin un efecto dramatico riba costo di produccion. Hende homber ta absorba un proporcion grandi di e tareanan di intensidad laboral halto, pero e suministro di hende homber no t’ey. Por lo tanto nan ausencia tin un efecto directo riba costo di produccion di economia.”
E mortonan prematuro di homber na Jamaica, di acuerdo cu experto y cu dato obteni di departamento di Registro General, ta principalmente atribui na asalto, accidente di trafico y enfermedad relaciona cu estilo di bida prevenibel.
Na 2015, un tasa di asesinato di 44 pa cada 100.000 habitante a pone Jamaica entre e top 5 di pais cu e tasa di asesinato (per capita) mas halto na mundo, di acuerdo cu e Informe 2016 di Crimen y Siguridad di US State Department.
Tambe e grupo di hende homber cu ta emigra anualmente ta contribui fuertemente na e reduccion di hende homber presente den edad laboral y reproductivo.
