Ayera mainta durante un rueda di prensa Fundacion Parke Nacional Aruba (FPNA), un fundacion independiente encarga cu e conservacion y maneho di areanan terestre y marino proteha na Aruba, hunto cu Wageningen University & Research (WUR) y Carmabi a anuncia e descubrimento di mas di 20 diferente sorto di especie di mata nobo na Aruba.

Den un periodo di 2 siman, Dr. Andre van Proosdij y Dr. John Janssen di Wageningen University & Research hunto cu Erik Houtepen, Head of Consultancy Department di Carmabi y Giancarlo Nunes, Research (WUR) and Conservation Manager di FPNA, hunto cu partnernan local y boluntarionan a bishita diferente areanan na Aruba manera Saliña Malmok, Saliña Cerca, Ser’i Teishi y Sero Colorado entre otro y asina studia mas di Aruba su vegetacion.

Sr. Nunes di FPNA a splica durante e conferencia cu e ultimo estudio di vegetacion cu a wordo haci na Aruba tabata den añanan 1990 y a wordo haci door di John de Freitas di Carmabi. E rapport aki no a wordo publica sinembargo, aña pasa, Dutch Caribbean Nature Alliance (DCNA) y WUR a aloca fondonan pa asina completa y publica e rapport aki di vegetacion di Aruba.

Ademas di haci estudio di vegetacion, e team di experto internacional cu ta na Aruba tambe tin como meta pa haci un encuesta di e datonan obteni for di e estudio di vegetacion haci den añanan 1990, marca areanan nobo protegi cu no tabata parti di e estudio di vegetacion anterior y tambe registra especie di matanan encontra na Aruba den e database di distribucion di mata cu a wordo lansa e siman aki.

E ekipo a bin tambe pa capacita e partnernan local y boluntarionan di organisacionnan manera Directie Natuur en Milieu (DNM), StimAruba, Ban Lanta y Planta y Santa Rosa pa asina ekipa otro nan cu e conocemento y habilidad pa asina por tin mas hende cu tin e capacidad pa haci estudio di vegetacion na Aruba.

Sr. Houtepen di Carmabi, a indica cu estudio di vegetacion cu a tuma lugar e ultimo dos simannan aki a lo provee datonan cu lo wordo usa pa un analisis preliminar pa wak con e vegetacion di Aruba a cambia e ultimo 25 añanan.

El a splica cu mayoria hende, den un tempo corto, ta mira cambionan den vegetacion, por ehempel e cambio di color di matanan ora awa yobe ta un cambio di tempo corto. Nan estudio ta enfoca ariba e cambio di vegetacion den tempo largo, por ehempel cada 10 aña of mas.

El a remarca cu pa midi e cambionan aki, tin metodonan standard cu mester wordo haci precisamente igual cada biaha pa asina por compronde y midi bon e cambionan den e vegetacion durante tempo largo.

Sr. Proosdij di WUR a confirma cu mas di 20 diferente especie di mata nobo a wordo descubri pa Aruba, y algun di e especie di matanan aki ta nobo pa e islanan ABC y tambe nobo pa Caribe Hulandes. Algun di e especie di matanan nobo aki ta inclui Melochia parvifolia y Cienfuegosia cf. affinis.

Na mesun momento Proosdij a enfatisa cu Aruba tin un biodiversidad di mata hopi diverso y ta sumamente importante pa tin un rapport di vegetacion pa Aruba, pa asina, unda cu mester, traha riba plannan di con ta bay conserva y proteha e vegetacion di Aruba.

Desde aña 2018, WUR y Carmabi ta trahando hunto pa colecciona data historico y data mas recien tocante composicion di vegetacion y distribucion di cierto especie di mata na e seis islanan di Caribe Hulandes. Observacionnan di mata di e database CACTUS aki awor ta disponibel online a traves di e website di DCBD (http://speciesdistribution.dcbd.nl). E website aki a wordo lansa siman pasa na Aruba.

El a splica cu e database CACTUS ta consisti di alrededor 2,500 releves di vegetacion digitalisa, resultando den casi 40,000 observacion di especie di mata. Esakinan ta keda complementa pa casi 10,000 registracion di mata cu potret digital, database di ciudadanonan cientifico, GBIF, reportahe di inventario y registracion adicional di veld.

Pa mas di 80% di e total di e especienan di mata nativo y no nativo presente na e seis islanan, awor ta dispone di algun observacion, cu ta cubri principalmente e periodo di 1950 pa 2022. Actualmente ta ehecutando un proyecto NLBIF cu e meta pa digitalisa registro di herbario historico adicional pa tur e seis islanan.

E website ta permiti seleccion di observacion dentro di temporada di aña, unda ta permiti analisis di tendencia di distribucion di cierto especie, specialmente den caso di datonan similar den e periodo compara. E analisis di tendencia ta un herment esencial pa construi listanan cora di especie den peliger di extincion. Ademas ta posibel pa mira buraconan di data pa especienan specifico, loke por anima e observadonan di mata entusiasma pa provee registro di observacion nobo di e matanan aki.

E cantidad di observacion pa islanan ta diferencia hopi, cu mayoria di e registronan (56 %) di Corsou, sigui pa Aruba (13%) y Boneiro (11%). Pa Sint Maarten, e datonan ainda ta relativamente poco. Ta agrega registro nobo ariba base regular y despues ta actualisa e data presenta den e website di DCBD. Pa mas informacion of pa explora por bishita http://speciesdistribution.dcbd.nl

Fundacion Parke Nacional Aruba ta maneha aproximadamente 24% di Aruba su tereno natural cu ta designa como area natural protegi. Como un organisacion di maneho di conservacion nan ta comprometi na preserva, proteha y mantene un sistema ecologico cu ta diverso, saludabel y resiliente pa Aruba.