Un carta fecha 13 di juli 2020 a bay dirigi na tanto Ministro Presidente, mr. Evelyn Wever-Croes como na ministro encarga cu enseñansa, dr. Rudy Lampe, di un grupo di mayor di actual alumno y ex-alumno di Colegio Arubano preocupa cu e desaroyo negativo di ultimo lunanan na e scol aki.

E peticion a bay acompaña pa e mas di 1.800 firma colecta via dos accion ‘online’ pa recolecta apoyo di mayor di actual alumnonan, y separadamente un accion pa apoyo di mayor di ex-alumno, ex-docente y docente actual y por lo demas tur persona preocupa cu e situacion na e scol. Hunto cu e peticion a bay un lista largo cu diferente ‘pijnpunten’ (punto problematico) cu e firmantenan ta señala cu ta hunga un papel den e actual situacion, cu segun e carta “ta varia di asunto financiero dudoso te varios caso unda e directiva di SMOA ta mustra visiblemente insuficiente transparencia y respet pa alumno, mayor y docentenan.”

E carta ta bisa entre otro cu ta pidi atencion di gobierno pa e asunto aki, tambe for di punto di vista di responsabilidad di gobierno pa calidad di enseñansa na Aruba, “cu den e tempo aki mas cu antes ta e fundamento di e ciudadano Arubano moderno, critico y feliz.” Por lo tanto ta pidi e mandatarionan pa atende e asunto aki tan pronto cu ta posible cu directiva di SMOA/SVOA. Esaki tumando na cuenta tambe e informacion cu nan a haya mientras tanto di mayor y docentenan, loke ta haci nan pensa cu lo ta bon pa haci un investigacion encuanto e calidad di operacion di parti di SMOA/SVOA. Tambe ta señala cu di otro banda tambe, manera di Obispado y di representacion di mayor y docentenan, a ser señala cu no tin confianza mas den e actual directiva di SMOA/SVOA.

E peticion, cu a cuminza online y a haya refuerzo via Facebook, tabata duna e opcion di keda anonimo. A scoge pa haci dos version, uno pa mayornan di actual alumno, y otro pa ex-mayor, ex-alumno, ex-docente y demas persona cu ta preocupa pa e situacion na e scol. E peticion pa mayor a haya 531 firmante, mientras e otro peticion a logra 1.308 firma, pa un total di 1.839 firma.

E carta tabata firma pa diferente persona, cu a adopta e nomber ‘Union ta Haci Forsa’ pa e accion aki. Nan ta: Sashah Figueroa; Grace Maduro; Silvia Magaly Maduro; Alfredo Capelo y Ivo Dongen.