Richard Dijkhoff, presidente recien reeligi di AVB a dirigi su mes na tur presente den stadion durante e apertura di weganan den division honor diabierna ultimo.
“Pa mi ta un honor grandi pa ta para boso dilanti awe pa duna inicio na un otro campeonato nacional, e biaha aki ta esun di Division di Honor 2017- 2018. Mi ta bisa honor, pasobra no ta mas cu algun siman pasa, cu mi tabatin e honor di conta cu un sosten mayoritario di clubnan di futbol di Aruba, pa mi sigui dirigi Arubaanse Voetbal Bond pa 4 aña mas. Esaki a wordo bisa na comienso di e apertura di e campeonato Division di Honor 2017-18 den Stadion Guillermo P. Trinidad”, asina e ta bisa den un relato cu nos a ricibi di e bond.
“Pa loke ta futbol na Aruba, mi por bisa cu ultimo aña, e deporte Rey a luci den gran forma. E campeonato 2016-2017 a produci no menos cu 1600 wega, entre tur e liganan, di mucha te veterano, den cual tin mas o menos 3 mil futbolista. Cu orguyo mi por bisa cu futbol ta e deporte mas practica na Aruba y tambe na mundo! Futbol no ta solamente un deporte pa competi, pa anota gol, pero tambe e ta promove disciplina, union, ta uni clubnan y paisnan.” Papiando di e organisacionnan internacional, Aruba e ultimo añanan a traha duro pa mehora nos nomber na e nivel ey, segun e bond. “Nos ta orguyoso di anuncia cu nos ta masha bon mira den Caribe cerca CONCACAF, na Hulanda cerca KNVB y na mundo cu FIFA. Tur e organisacionnan aki ta brindando nos apoyo, tanto financiero, pero tambe cu conocemento.”
