E cantidad di caso nobo di coronavirus registra tabata mas cu 10mil pa prome biaha den e 24 ora te cu ayera mainta, segun cifranan di instituto nacional di salud, RIVM ta mustra.
Den total, 10,007 caso nobo a keda reporta na autoridadnan, un aumento di 726 riba cifranan di diahuebs. Maske e cantidad di test positivo a aumenta, esaki tambe por ta vincula na un aumento den cantidad di test realisa, cual tabata e caso siman pasa, NOS a bisa. A expande capacidad di test considerablemente desde cuminsamento di october, danki na e participacion di laboratorionan stranhero, y e servicio di test awo por maneha alrededor di 50mil test pa dia.
Sinembargo, e realidad di con lihe e virus ta plamando no ta bay ta disponibel te cu diamars, dia cu RIVM lo publica su analisis semanal mas recien.
Otro 248 persona a ser admiti den hospital den un dia, 10 mas cu diahuebs, y 43 persona a bay den unidad di cuido intensivo ICU, 13 menos cu e den e periodo di 24 ora anterior. Mayoria di esnan admiti den ICU ya tabata ricibiendo tratamento na hospital. E admisionnan nobo ta trece e cantidad total di hende ricibiendo tratamento na hospital na 2073, un aumento di 70 den 24 ora, mientras e cantidad di pashent den ICU a aumenta cu nuebe na 472.
Algun pashent Hulandes tambe a ser transporta via aereo na hospitalnan na Alemania pa motibo di falta di cama na Hulanda.
A pesar cu ta e vakantie di medio tempo, e ministernan a tene ayera un reunion extra di gabinete na Den Haag pa discuti e situacion di coronavirus na Hulanda. Jaap van Dissel y e lidernan di otro think-tanknan di gobierno tambe a reuni cu ministernan ayera mainta pa discuti e crisis. Prome minister, Mark Rutte a bisa na momento di anuncia e lockdown parcial anteriormente e luna aki lo evalua e situacion un biaha mas proximo diamars.
