Ingela Lacle, un ciudadano cu hopi experiencia den cultivacion di su propio cuminda y hardineria, ta bisa cu destruccion di nos naturalesa lo hunga un rol den e fin di nos cuminda basico pa falta di conocemento.
Sra. Lacle tin 13 aña activo cu horticultura y botany. Horticultura tin mas di haber cu plantacion y maneho di un hardin/matanan medicinal, y botany ta e conocemento di e anatomia di un planta. Sra. Lacle tambe ta bezig cu un herbarium cual ta un coleccion di mata riba papel, seca y skirbi cu tur su detayes y anatomia pa locual ta nos plantanan local. E ta haciendo esaki riba su propio esfuerso.
Cambio di clima ta andando pa 50 aña caba y nos tambe ta aden segun sra. Lacle.
Sinembargo e ta bisa cu na Aruba loke ta remarcabel ta cu nos por cultiva mas awor cu nos tabata por algun aña atras.”Nos clima te ainda ta cambiando na nos fabor. Lamentablemente pa via di tur e destruccion cu nos ta haciendo nos no ta dunando e hendenan cu ta purba cultiva e chens. Pasobra nos falta e conocemento cu si nos sigui destrui, nos ta caba tambe locual ta cumindanan basico cu awor ta birando hopi mas caro.” Esaki ta algo cu ya caba den cierto congresonan a bini dilanti anto e no ta bay baha.
“Si hende ta kere cu prijs di importacion di fruta y berdura lo baha nan ta fout.
Al contrario, e ta bay sigui crece y esey bo ta haya hopi biaha pasobra na Aruba falta presencia di congresonan di agricultura internacional cu ta tuma luga tur aña. Nos falta e conocemento di ta presente den esakinan tambe”, e ta bisa. Na Corsou por ehempel nan a detecta aña pasa un palma Antiano cu ta crece solamente na Corsou y Bonaire. Danki na hendenan cu a bin di exterior y haci estudionan cu a detecta esaki. Esaki ta tipo di cosnan por ehempel cu ta haci falta di atencion riba Aruba segun sra. Lacle unda cu nos tin varios mata unico cu nos no sa net nada di nan. Hopi di nan cu a bay y ta bay den direccion di extingui anto nos no tin nada documenta riba nan.
Falta di conocemento
Na Aruba nos tin hopi agricultura cu ya caba ta cambiando durante aña, y falta hopi trabao den e parti di plantacion di mata. “Mi tin añanan motivando hende pa planta y mi ta wak constante e ta bay y bin. Nos tin un falta di conocemento hopi grandi den e parti aki sigur”, segun sra. Lacle. E ta bisa cu hopi biaha e ta mira hende cu ta cuminsa cu hopi animo y ta retira despues di algun tempo.
E conocemento di con un mata ta crece y su anatomia ta cosnan hopi importante pa sa con pa planta. Un estudio di horticultura ta encera cuater aña intensivo, pa despues haya botanica y yega na seis/ocho aña di estudio pa wak unda bo ta specialisa. “Por medio di falta di conocemento di malesanan, di nos propio clima y di no sa cu bo no mester un espacio grandi pa planta pa bo mes. Un hofi di cushina mes por yuda bo bay dilanti. Hopi biaha bo mester djis cuminsa chikito”, segun sra. Lacle.
Kita mata mucho trempan
Sra. Lacle ta duna curso tambe riba basic botanica y su conseho semper ta pa cuminsa chikito y no bay mesora den grandi. Plantacion/cultivacion di cuminda no ta solamente encera hinca simia den tera y ta cla. “Corda bon cu bo mester traha cu e tera tambe. Hopi fertilizer tambe ta kimico y nan ta mata bacterianan necesario den tera. Hende no mester ta pura pa traha placa di e cos aki unda bo ta mira cu nan ta cuminsa kita mata mucho trempan pa bende.” E mata mester di haya su bacteria cu tin den tera pa crea mas vitamina cu mester pa nos anto e mata mes. E falta di conocemento no ta na Aruba so pero sigur por wordo mira internacionalmente unda cu kier djis saca placa sin tene cuenta riba con ta cultiva e cuminda segun sra. Lacle.
“Pa planta, e mester bira un pasion. Si tur hende cuminsa chikito, e ta cuminsa bira algo.” Sra. Lacle a cuminsa chikito tambe por ehempel cu dos mata di jambo, tomati y promenton. Ora el a ripara esakinan a cuminsa bay bon, el a keda agrega otro mata acerca. Te na final awor e tin basta un plantacion y ta bisa cu cuminda no ta falta na su cas.
