E pandemia di coronavirus na Colombia ta cobrando mas victima entre e poblacion mas vulnerabel, siendo e comunidadnan indigena, den un pais altamente multicultural, suheto di proteccion special cu a mira nan mes afecta pa e plamamento di e virus den nan teritorio.
Segun Organisacion Nacional Indigena di Colombia (ONIC) ta 614 indigena a wordo contagia cu Covid-19 na Colombia, 19 di nan a muri pa e enfermedad peligroso aki.
E mortonan a registra na e pueblonan di tikuna, tariano, miraña, inga, yucuna, ocaina, yanacona y mokana.
Pa ONIC e situacion ta uno preocupante y ta rekeri di un atencion special urgente. Ta destaca cu e plamamento di e virus ta hopi lihe entre comunidadnan unda a presenta casonan y cu den menos di un siman e cantidad di contagio a aumenta pa 100 caso nobo.
Di acuerdo cu ONIC e riesgo di contagio pa coronavirus a extende ta 341.021 famia indigena den e pais. Pa e rason aki a lanta un alerta pa e comunidadnan ubica na Mapiripán (Meta); Fortul y Tame (Arauca); Chaparral y Ortega (Tolima); San Marcos (Sucre); Sabanas de San Ángel (Magdalena) y na media Guajira, pa cu lo subi e plan di contingencia, di proteccion y cuido.
E recomendacion special ta pa departamentonan di Meta y Arauca por ehemplo, pa impedi cu personanan aheno pa comunidadnan indigena cu ta biba eynan lo drenta den e comunidadnan aki.
Na mesun tempo a haci un yamada pa Gobierno Nacional pone garantia pa e bida di e comunidadnan indigena, pa brinda e condicionnan pa nan por permanece den aislamento preventivo obligatorio, debi na impacto negativo den e sector como economia, cultura y practicanan tradicional di e comunidadnan aki.
