Mayoria di e causa di fayonan medico ta pa falta di informacion of ora cu informacion no wordo duna den manera adecuado. Esaki minister di Salud Publico ta bisa Bon Dia Aruba. E ta enfatisa cu poco biaha ta trata di foutnan fatal.
Dia 23 di november, Corte den Prome Instancia a dicta cu hospital, un specialista y Pais Aruba mester paga un victima di fayo medico un suma di 80.000 florin na daño inmaterial. Abogado Richie Kock a informa riba esaki como cu e kier informa comunidad di esaki y riba e posibilidadnan cu ley ta duna pa victimanan den ley civil pa busca compensacion pa daño inmaterial (sufrimento emocional).
Pa motibo cu Ministerio di Salud no tin un bon sistema bon organisa, e comunicacion entre e partnernan den e veld no ta adecuado. Esaki ta haci cu bo no sa en berdad cuanto keho tin. Hospital tabata un di e poconan cu tabata tin un comision di keho anto aworaki tin un ‘klachtenbemiddelaar’ unda nan tin un archivo bon registra. Na cierto kehonan cu na momento cu nan yega na un nivel di calamidad, segun Minister Schwengle nan mester wordo registra na Inspectie cual no a pasa mucho den pasado.
“Esey ta un problema den comunicacion y protocol entre e partnernan y gobierno, den e caso aki Inspectie cual tabata eigenlijk un inspectieafdeling awo e ta bay bira un Inspectie riba su mes.”
E factor eigenlijk di mas importante ta dicon e veld te ainda no a raporta bon ta pa motibo di miedo. “Nos ta biba den un isla chikito anto ora cu un cos bay malo, hopi hende tin miedo di papia di dje pa motibo di represalia cual a yega di pasa den pasado tambe. Unda cu un hende kier ta honesto anto reporta algo pa e calidad drecha anto nan ta colga e persona ey.”
Fayonan y protocol di comunicacion
Segun Minister Schwengle, con cu bay bin nos tur por haci fout anto claro tin cierto nivelnan di foutnan cu no ta aceptabel unda e carera di e persona ta termina. E mandatario ta splica Bon Dia Aruba cu mayoria bes no ta asina, bisando cu: “Si bo bay culpa un hende pa un cos cu ta foutnan cu ta aceptabel, claro bo mester bay siña for di dje anto pa bo caba cu su carera tampoco no ta corecto. Aworaki nos ta den dialogo cu e Inspectie nobo na con nos por yega na un protocol di comunicacion y duna e veld e siguransa pa meld kico cu ta sin core un peliger mesora. Claro e calamidad ta wordo investiga anto si na final di dia e persona comete realmente un eror fatal, claro e ta bay tin consecuencia.”
Den nos publicacion di diaranson ultimo, Bon Dia Aruba a trece pa dilanti cu a base di informacion di Horacio Oduber Hospital, abogado Richie Kock a constata cu e kehonan ta varia anto pa aña 2013 tabata tin 193 pashent cu a entrega keho. Sr. Kock ta agrega tambe cu: “E relato no ta specifica kico exacto y cuanto ta trata di fayo medico.” Minister Schwengle no por a detaya kico exactamente ta e fayo mediconan aki anto si/of tin algun di nan cu ta resalta mas cu otro, pero e ta enfatisa cu: “En general, Aruba no ta dje diferente di Merca, Canada ni Hulanda. Mayoria di foutnan ta a base di comunicacion unda cu a bin un disgusto of un mal comprendemento, no a duna e famia of pashent suficiente informacion anto tur e consecuencianan despues.”
