Minister di Economia, Richard Arends a bisa cu nan a cuminsa caba cu e iniciativa pa simplifica mas e proceso pa haci negoshi na Aruba. Igualmente mas negoshi di diferente sector ta interesa di establece nan mes pariba di brug probechando e status fiscal special di “San Nicolas Zone”
Ya caba – segun e mandatario- nan a identifica algun di e ‘top sector’ cu ta tecnologia limpi, industria creativo y exportacion di conocemento. E areanan aki tin un tratamento special fei di departamento di Asunto Economico pa facilita nan operacion na Aruba. E mandatario a señala cu e ta den un dialogo constante cu Camara di Comercio (KvK) como tambe ATIA pa wak unda gobierno por haci mas lihe y facilita e hacimento di negoshi riba nos isla.
Zona special San Nicolas
Minister Arends a bisa cu e area special di San Nicolas cu a conoce un regimen fiscal pa stimula e inversion y desaroyo economico pariba di brug. E hoben mandatario a señala cu ya caba, sin e refineria andando, tin alrededor di 60 permiso cu nan a duna pa e zona special di San Nicolas.
Nan ta permiso cu tin di haber cu restaurant, instituto financiero, companianan di construccion, companianan cu ta haci trabou pa e refineria cu a yega di cera den pasado y cu nan ta habri bek, etc…
Segun e mandatario, e no tin di haber cu un sector so, sino diferente sector. Di otro banda e refineria ta rehabilitando y tin mas aplicacion cu ta wordo trata pa otorga e empresanan e status special di “San Nicolas Zone”.
E ta haya cu e proceso di reapertura di e refineria a bira un catalisado di actividad economico na San Nicolas, pero tambe den otro partinan di nos isla. “Esey ta e parti macro economico cu nos ta premira tambe den e momento di rehabilita y habri e refineria bek”, el a declara na Bon Dia Aruba.
E area di actividad nocturno na San Nicolas tambe tin nan atencion. Hunto cu minister di Turismo, Mike de Meza, ta wordo diseña un plan completo riba e desaroyo turistico di San Nicolas. Aunke minister Arends ta pone atencion mas tanto riba desaroyo economico y percura cu mas empresa ta establece su mes pariba di brug.
El a bisa cu e desaroyo economico di San Nicolas den su totalidad ta algo cu nan ta discuti hunto cu ATA, ministerio di Turismo y tambe e parti fiscal y huridico.
