E website www.traficosigur.aw a publica e cifranan cu data di Forensys di e aña aki, caminda a publica cu 5.667 accidente a tuma luga den aña 2024, y pa loke ta trata accidente fatal tin 8 fayecido.

Mediante un anuncio haci riba su red social, minister di Husticia y Asuntonan Social Rocco Tjon a informa cu 1 di maart ultimo a cuminsa e campaña nacional pa conscientisacion den trafico, debi cu cifranan di accidente di trafico ta hopi alarmante.

A base di palabracionnan haci cu Alto Comisario, Ramon Arnhem como tambe Alto Comisario Suplente, Robert Candelaria, a tuma e decision pa bin cu mas vigilancia pa loke ta trafico, na unda ministerio di Husticia y Asuntonan Social ta bay lansa un campaña nacional di conscientisacion di siguridad di trafico pa henter aña 2024, manera a ser anuncia na december di aña pasa.

Manera ta conoci, na Aruba tin hopi accidente di trafico, y a base di cifranan cu a ricibi, esaki a indica di ta stabiel, pero demasiado. Sinembargo, aun asina e ta alarmante, pa cual motibo a reuni cu alto comisario suplente Candelaria, y tambe cu alto comisario Sr. Arnhem, caminda a tuma e decision pa aumenta visibilidad di parti di Cuerpo Policial y ademas, ta bay percura pa tin mas unidad riba caya, pa asina por atende cu e diferente situacionnan, entre otro di trafico, na un manera mas agil.

E prioridad di e website aki ta pa informa y conscientisa comunidad di Aruba tocante seguridad den trafico. Sea ta un residente local of un bishitante kende ta desea di explora nos isla bunita, seguridad riba caminda of canto di caminda ta primordial.

Den e website www.traficosigur.aw por haya diferente informacion tocante seguridad den trafico como por ehemplo, e riesgonan di core auto bao influencia of uso di telefoon e cual ta aumenta e riesgo di causa accidente cu 23 biaha mas.

Entre e cifranan di mas actual cu Forensys tin disponibel den e website aki, ta ilustra cu na 2022 e caya unda mas accidente di trafico a tuma luga tabata L.G Smith Boulevard unda a registra 7.341 incidente y 13.069 di e partinan tabata envolvi den accidente.

75.83% di e accidentenan tabata pa via di no pone atencion riba caminda.

55.90 tabata hende homber esnan cu mas a keda envolvi den accidente na aña 2022 compara cu 35.70% di hende muhe.

2.357 persona tabatin un averahe di entre 26 pa 35 aña di edad.

E marca di auto mas envolvi den accidentenan di trafico na Aruba te cu aña 2018 tabata Toyota cu 2.123 accidente.

Por a recorda cu na comienso di e aña aki 6 accidente fatal a tuma luga na Aruba unda Cuerpo di Polis a informa tocante e campaña di prevencion “No mas Morto den trafico.”

Pa esaki, altocomisario drs. Ramon Arnhem a pone enfasis cu cada accidente fatal ta di mas cu ta laga famianan den tristesa y kibra pa resto di nan bida. Cuerpo Policial Aruba lo sigui tin control pisa den trafico.

“Nos ta haci un suplica si abo ta bou influencia no stuur. Busca un amigo responsabel, automobilistanan como tambe coredo di brommer, bicicleta y peaton cu ta forma parti di nos trafico mantene boso na e ley y reglanan pa asina tur hende por yega nan destino sigur,” a sigura.

Pa e mesun motibo aki, ta importante pa Bon Dia Aruba como medio di comunicacion responsabel, por conscientisa su lectornan informando cu un tin vigente un multa di 10mil florin pa esnan cu ta core cu telefon den man.

Por lo tanto, no ta permiti pa tin e telefon “den man” ora ta core auto segun articulo 7a di Landsbesluit Verkeersregel AB 1999. Si un persona ta ser gara cu telefon den man ora di core auto, e persona por haya un multa di maximo 10.000 florin of un sentencia maximo di 3 luna.

Biniendo back riba e peticion di altocomisario, aki na Aruba pa siman por nota un cantidad grandi di caso nan di incidentenan y accidentenan den trafico cu ta ser ocasiona pa core bao di influencia di alcohol.

Como procedura y manera ley ta stipula, e conductor cu ta sospecha di core bao influencia di alcohol, lo mester haci un alcohol test, cual aki na Aruba ta tuma luga primeramente pa medio di un ‘Breathalyzer’ (via rosea). E sospechoso mester supla y e resultado no mag di pasa 220 ug/l pa rosea supla.

Multa pa core auto bao influencia por yega hasta 25.000 florin: Den cierto caso tambe por test e nivel di alcohol door di haci un test di sanger. E resultado no por surpasa 0.5 mg per 100ml di sanger. Si ta ser comproba cu e persona ta surpasa e limite di alcohol, por haya un multa di maximo 25.000 florin of un sentencia di maximo 2 aña.

E opcion mas sigur ta scoge pa keda sin consumi alcohol si ta bay core auto. Hasta un cantidad minimo por afecta e habilidad pa maneha un auto. Tampoco tin un manera sigur cu por constata of controla cu ta den limite di alcohol legal.

Alcohol ta reduci e funcion di e celebro, afectando pensamento, rasonamento y coordinacion di musculonan. Tur e habilidadnan aki ta esencial pa maneha un vehiculo cu siguridad, mas e cantidad di nivel di alcohol eleva den curpa di un persona, mas e efectonan negativo riba su sistema nervioso central ta aumenta.

Den bista di e preocupacionnan di comunidad pa motibo di cantidad di casonan di accidente, unda tambe tin caminda cu peatonnan ta ser trapa y hasta ultimo temponan algun a perde nan bida, Comision di Trafico Sigur a comparti tips importante pa conscientisa tanto chauffeurnan pero tambe peatonnan, unda tur usuario tin un responsabilidad comparti ora cu nan ta participa den trafico y ta esencial cu ambos partidonan keda vigila proactivamente nan movecionnan den trafico.