(NLTimes) – E cantidad di menor no acompaña cu a solicita asilo na Hulanda ta bin aumentando, cu mas di 5,400 aplicacion te cu november ultimo, compara cu como 4,200 na 2022 y 2,200 na 2021, segun NOS a reporta ayera.

E proporcion di menornan no acompaña dentro di e cantidad total di aplicacion pa asilo na Hulanda a aumenta na 16 porciento e aña aki, un aumento for di e 9 porciento na 2015. Instituto WODC a presenta investigacion riba e motivacion di e solicitantenan jong aki na Tweede Kamer ayera.

Hulanda tabata considera un destinacion faborable pa motibo di procesonan relativamente rapido di asilo y reunficacion, manera Servicio di Inmigracion y Naturalisacion (IND) a nota. Investigadornan ta anticipa cu e tempo largo di espera pa asilo na Hulanda ta bay bira conoci entre e hobennan, potencialmente cambiando e imagen anteriormente positivo di e pais.

Mayoria di solicitante jong ta yega Hulanda pa casualidad, huyendo di condicionnan insigur na nan pais natal of na paisnan unda inicialmente nan a huy. E rutanan cada bes mas compleho, incluyendo contratemponan, a conduci na un efecto di retraso resultando den un acumulacion di aplicacion pa asilo e aña aki.

Bao Regulacion di Dublin, solicitantenan menor di edad no por ser manda back na nan prome pais di yegada na Europa. Hobennan hopi biaha ta scoge nan pais destino en ruta, influencia pa varios factor. Por tin hopi motibo pakico nan ta yega na Hulanda, incluyendo informacion di conocidonan, conseho di contrabandistanan di hende, of amistadnan forma durante nan biahe cu otronan bayendo Hulanda. Politicanan di asilo estricto na paisnan manera Dinamarca tambe ta afecta nan escogencia pa Hulanda.

Mita di e solicitantenan hoben ta for di Siria, atrai pa Hulanda pa su reputacion como un sociedad safe cu derechonan humano garantisa y prospectonan futuro pa hubentud. Adicionalmente, hopi biaha nan tin rednan social extenso dentro di e pais.

Desde 2019, tin un aumento den menornan no acompaña yegando Hulanda y Europa. Hopi biaha, mayornan ta manda e yiu mas grandi cu por soporta e biahe dificil riba su mes ora cu nan no por afford pa huy cu henter e famia, mientras e tata ta keda atras pa cuida resto di e famia.

Segun investigacion anterior di IND, 80 porciento di menor no acompaña cu ta permiti pa keda na Hulanda ta aplica pa reunificacion familiar. Pero esaki no semper ta e obhetivo principal: algun biaha, ta manda muchanan leu pa nan propio seguridad. Hobennan restringi pa norma religioso of conservador tambe tin mas probabilidad di dicidi pa bay riba nan mes.

Ministerio di Husticia y Seguridad recientemente a expresa preocupacion serio tocante e escasez di shelter pa menornan no acompaña. Den un carta na Tweede Kamer, nan a nota cu te cu dia 30 di october, 290 menor tabata kedando na Ter Apel, excediendo su capacidad maximo di 55. E facilidad tin problema pa duna guia adecua ora tin mas cu 120 hoben presente. Ta spera cu e fluho ta bay keda halto otro aña.