stimami sterilisami (2).jpg

E campaña di Stima mi Sterilisa mi ta bayendo hopi bon segun Sra. Natalie Booi, veterinario na Animal Care Clinic, hopi hende ta registra cual ta wordo procesa pa e boluntarionan. “Nos a opera mas cu 1000 cacho caba y e number nan di registracion ta den 3000 caba.”

Banda di e cantidad di registracion cu ta bayendo hopi bon Sra. Booi a splica cu na Animal Care Clinic a mira cu hopi di e cacho y pushinan cu ta wordo treci, hopi di nan ta esunnan di caya, sin doño. Awo cu e ta asina barata bisiñanan of otro amantenan di bestia ta pone man hunto y cera e placa pa haci e operacion di sterilisacion. “Hopi cacho ta bin cu bo ta ripara cu no ta haya un cuido 100 porciento, pero aworaki cu e  ta mas barata, tur hende ta probecha y nan opera nan.” Segun Sra. Booi ta net pa e grupo ey e intencion di e campaña ta, claro tambe pa esunnan cu ya kier a opera nan cacho, y cu awo a haya un gang. 

Anteriormente of e prijs regular ta varia di 235 pa 300 florin mas o menos dependiendo di e bestia. E ta depende di e tamaño di e cacho, por imagina cu e no ta costa mes tanto pa sterilisa un Chihuahua of pa un Fila Brasilero. “Awo awo via di e campaña e doño ta paga 100 florin so.

Conscientisacion 

Como cu ta haya hopi cacho cu tin hopi carpata y hopi purga pa motibo cu  nan ta cana riba caya of tin di nan cu ta na estado caba, di mes e operacion no ta esun standard y e ora e ta sali poco mas caro, pero asina mes un prijs mas barata cu si e persona mester a paga e prijs regular.

“Tambe e echo cu e personanan ta bin akinan ta probecha pa conscientisa nan, ta papia di carpata y cuido entre otro. Y ora mira cu e cacho tin sintoma di anemia tambe e hendenan ta bay cu e remedinan di biaha. Tur esakinan ta yuda pa mehora e cuido di e mascota.”

El a sigui splica cu nos tur a wordo sorpresa door di e reaccion cu comunidad a duna e campaña. Por a spera reaccion positivo si como cu den pasado tabatin bon reaccion cu otro campañanan. Por ehempel di ARA cu den tres luna di tempo a opera 1000 cacho. Pero e biaha aki e organisacion di Bucuti & Tara Beach Resort y tambe e medio social, corant y television a percura cu e campaña ta hayando hopi bon reaccion. “Apenas 12 di januari a opera e prome cacho y aworaki net poco mas cu un luna por mira cuanto cacho ya a wordo opera y tambe cuanto ta registra. Mi ta spera cu e ta algo duradero, cual ta algo cu ami hunto cu coleganan a para firme pe. Nos a wak den pasado cu pa cierto motibonan cu otro iniciativanan tabatin intencion pa sigui cu e proyecto, pero e fondonan no a bin mas di gobierno y e campaña mester a stop. E logro ta pa baha e cantidad di cachonan riba caya, esunnan neglisha, cu ta nace tur dia y ta sigui reproduci nan mes. E logro aki por wordo yega solamente si tin un campaña di mas tempo. Si e wordo haci pa algun luna e ta yuda pero di mes e no ta bay tin e efecto desea cu ta soluciona e problema y tin cachonan riba caya.” Sra. Booi a enfatisa cu e ta spera cu esaki por continua pa motibo cu ta trata di fondonan,  y pues e fondonan di nan lo ta bayendo hopi mas lihe cu a calcula na prome instante. E intencion ta si pa e campaña dura 2 aña. Sra. Booi a termina bisando.