Un grupo di studiante di Aureus University a bira malo pa causa di un parasito. Ta trata di e parasito “entamoeba hystolytica”, asina rector di universidad aki, Dr. Frank Navarette a declara na Bon Dia Aruba. Mas cu 30 studiante cu a bira malo pa causa di e parasito aki.
Ta asina cu varios studiante di Aureus University a resulta malo. Dialuna pasa a wordo registra e prome caso di studiante malo cu entamoeba hystolytica” popularmente conoci como amoebe. Sinembargo ya caba tabatin varios studiante malo cu problema di bariga, mas tanto sacamento y diarea. Algun di nan tabata basta malo otro no tanto. E prome studiante cu a bay cerca un doctor local kende despues di un control y test a wordo diagnostica cu amoebe. E studiante aki ta esun cu informa e rector di e instituto aki riba e problema di salud aki.
Dr. Navarette a laga sa cu di biaha nan a bati alarma cerca e studiantenan malo pa bay controla nan mes cerca e mesun doctor. Ya cu e mesun doctor aki lo por samina nan y traha un rapport di nan. El a abstene di duna e nomber di e doctor, ya cu e no ta autorisa pa haci’e y pa respet tambe. Tur studiante samina a wordo diagnostica cu amoebe y nan a surpasa mas cu 30. Ainda tin mas studiante malo cu talbes mas dilanti lo manifesta e sintomanan di amoebe. Ya cu e malesa aki tin un periodo di incubacion di dos pa cuater siman, y tin caso cu ta tarda mas pa manifesta su mes.
Studiantenan bou tratamento
Actualmente e studiantenan diagnostica cu amoebe ta bou tratamento. Tambe nan ta monitor esun cu tin sintomanan, pero no a wordo diagnostica ainda cu e parasito. Ya cu tin biaha den e prome test e ta sali negativo y despues ta resulta positivo. Tambe el a laga sa cu no ta existi risico cu e parasito aki lo plama den nos comunidad, ya cu Aruba no tin riu. Ademas paden di nan universidad nan a adopta tur medida pa evita cu mas studiantenan lo por resulta afecta. Un di e medida tin di haber cu nan cafetaria no ta prepara mas vegetal curu, sino cu tur cos ta wordo cushina.
Raporta cerca DESPA
Dr. Navarette a informa cu departamento di Salubridad Publico (DESPA) a wordo alerta debidamente riba e casonan di nan studiantenan. Unabes cu nan a ripara cu e cantidad di caso di studiante malo cu amoebe a aumenta di biaha a wordo raporta cerca nos autoridad di salud publico, el a laga sa.
Un posibilidad cu e hobennan studiante a bira malo ta bin fei e mesun cafetaria di nan universidad. E personal cu ta traha den e cafetaria aki ta hendenan profesional cu a bay na scol di cushina y cu nan tin nan propio protocol pa atende cu nan trabou.
P’esey Dr. Navarette tin su duda cu esaki lo por ta e fuente di e malesa aki. Pero e no ta descarta e posibilidad cu algun trahado cu tabata malo cu diarea y no a laba bon su man. Tur e posibilidad aki ta bou conocemento di departamento di Salud Publico cu ta investigando. Ya caba nan a haci algun test durante tres dia cerca e personal di e cafetaria. Tambe nan a bay cu algun muestra di awa y otro tipo di muestra di e cushina.
Otro posibilidad cu Dr. Navarette a declara ta esun cu nan propio studiante ta organisa un actividad entre nan mes un biaha cada cuater luna. E actividad aki ta un tipo di feria di cuminda of gastronomia internacional, ya cu Aureus University tin studiantenan di henter mundo.
Nan ta organisa un “Dia di Diversidad” caminda nan tur ta cushina y nan tur ta comparti nan cuminda. “Por ta algun di nan no a cushina cu cuidao”, el a bisa. E actividad aki a sosode tres pa cuater siman pasa cu ta cay entre e periodo di incubacion di e parasito aki. Nan ta evaluando cual tabata e fuente exacto di e malesa aki.
Nan tambe ta come afo, pero den diferente sitio. E unico sitio cu nan ta comparti hunto ta e cafetaria di nan universidad of e dia cu nan tabatin nan actividad di “Dia di Diversidad”, esey ta e dos posibilidad potencial cu nan tin. Pero no ta facil pa determina fei unda exactamente e malesa a wordo plama.
