(AP) – Un corte Britanico a declara diaranson cu polis por confisca mas 3.3 miyon dollar pa cubri añanan di impuesto no paga for di influencer Andrew Tate y su ruman homber Tristan Tate.
Devon and Cornwall Police Force a bay corte pa reclama e placa, cual ta den 7 cuenta di banco congela, for di e rumannan Tate y un muhe identifica solamente como J.
Westminster Magistrates Court, Magistrado Hefe Paul Goldspring a declara cu transaccionnan financiero haci pa e rumannan, incluyendo transferi casi 12 miyon dollar den un cuenta na nomber di J, tabata un “evasion directo” di e autoridadnan di impuesto.
“Mi ta satisfecho basa riba e balans di probabilidadnan cu nan a eherce conducta pa deliberadamente evadi nan responsabilidad cu impuesto,” Goldspring a bisa den su veredicto.
E procesonan ta civil, cual ta carga un standard di prueba mas abao compara cu casonan criminal, pues Goldspring mester a dicidi a base di e balans di probabilidadnan si e rumannan a evadi impuesto.
Un abogado di e forsa policial a bisa cu e rumannan ta evadi impuesto “como custumber” y nan no a paga ningun impuesto riba e ganashi di 21 miyon moneda Britanico for di nan negoshinan online, incluyendo War Room, Hustler’s University, Cobra Tate y OnlyFans entre 2014 y 2022.
Andrew Tate, di 38 aña, a acusa e gobierno di “robo” a causa di congela su cuentanan y “confisca tur loke nan tabata por.”
“Esaki no ta husticia; e ta un atake coordina contra ken cu tribi di desafia e sistema,” Tate a bisa den un declaracion. “Esaki ta trece dilanti preguntanan serio tocante con leu autoridadnan lo bay pa silencia oposicion.”
Na e audiencia, abogado Sarah Clarke a cita un video publica online pa Andrew Tate, den cual el a bisa: “Ora mi tabata biba na Inglatera, mi tabata nenga di paga impuesto.” El a bisa cu J – ken no por ser nombra a causa di ordo di corte – no tabata involucra cu e rumannan su negoshinan.
Abogado di e rumannan, Martin Evans, a argumenta cu e transferencianan di banco tabata “completamente normal” pa personanan cu tin negoshi online. El a bisa cu e rumannan ta gasta placa riba “un cantidad di autonan exotico,” pero no a haci nada ilegal.
Documentonan di corte ta mustra un total di alrededor di 3.4 miyon dollar cu ta den e 7 cuentanan cu polis awo por confisca.
